20 jaar gelede

MAANDAG 7 FEBRUARIE 2005

– Warm toestande regoor die land sal dié week voortduur met enkele donderbuie wat in die verre noordooste van die land kan voorkom.

– Fiskale lamsakkigheid aan regeringskant en die steeds krimpende meevaller van die Suider-Afrikaanse Doeane-unie (Sacu) voorspel taai ekonomiese tye vir minstens die volgende twee jaar.

– Die beplande Langer Heinrich-uraanmyn in die Namib Naukluft Park het verset uitgelok van die kant van die Nasionale Vereniging vir Menseregte (NSHR).



DINSDAG 8 FEBRUARIE 2005

– Die luukse swart Mercedes Benz ML500 van Harry Simon was aan die verkeerde kant van die pad en het teen sowat 180 km/h voortgesnel toe dit op die aand van 21 November 2002 teen ’n stilstaande Toyota-bakkie gebots het.

– ’n Kommissie moet dringend saamgestel word om ondersoek te doen na die redes vir die reuse-omvang van kinderverkragting in Namibië.

– Die Ministerie van Basiese Onderwys, Sport en Kultuur sê alle onderwysers sal die vrugte van ’n herinterpretasie van salarisskale in die beroep pluk.



WOENSDAG 9 FEBRUARIE 2005

– Namibiërs sal hul asem tot minstens aan die einde van Maart moet ophou om te sien om die Regering se begrotingstekort tot die internasionaal aanvaarbare standaard van 3% van die bruto binnelandse begroting (BBP) beperk is.

– In die doodsnikke van sy presidensiële termyn het Pres. Sam Nujoma vir oulaas vir ’n verrassing gesorg met ’n klap na sy voormalige minister van buitelandse sake, mnr. Hidipo Hamutenya.

– Spesiale verlof is aan Regter Pio Teek toegestaan tot tyd en wyl President Sam Nujoma bekend maak of hy van sy pos as Appèlregter in die Hooggeregshof onthef gaan word al dan nie.



DONDERDAG 10 FEBRUARIE 2005

– ’n Ooggetuie van die Harry Simon-motorongeluk by die afdraai na Langstrand het gister ’n volgepakte hofsaal laat regop sit in die saak van strafbare manslag teen die voormalige wêreldbokskampioen.

– In ’n geskiedkundige stap het President Sam Nujoma gister binne die bestek van 24 uur ná hy die aanbevelings van die Regsdienskommissie ontvang het vir Appèlregter, Pio Teek, met onmiddellike effek uit sy amp geskors.

– Alle vismaatskappye in Namibië is vandag swart ekonomiese bemagtigingsmaatskappye, terwyl die land se vyf grootste mynhuise hul reeds in die proses van dié ekonomiese omwenteling bevind.



VRYDAG 11 FEBRUARIE 2005

– Die besluit van Windhoek Hoërskool (WHS) om ’n tienermoeder hertoelating tot dié skool te weier, is gister deur die Hoërhof na die skool terugverwys.

– Geen bewyse bestaan volgens die Verkiesingskommissie van Namibië om die uitslae van die November-verkiesing vir lede van die Nasionale Vergadering (NV) te verwerp nie, omdat stemme waarvan nie rekenskap gegee kan word nie, onbeduidend is en nie ’n verskil aan die toekenning van setels in die NV sal maak nie.