20 jaar gelede

DINSDAG 29 MAART 2005

– Efundja, die vloed in die Cuvelai-delta wat vis en ander noodsaaklike lewensmiddelle vir derduisende mense in die sentrale deel van Owamboland bring, het gekom.

– ’n Oënskynlike lae dodetal op die land se paaie die afgelope Paasnaweek het Sondag in ’n enkele oomblik die hoogte ingeskiet met die dood van sewe mense tydens ’n grusame ongeluk.

– Een van die drie aanklaers in die Caprivi-hoogverraadsaak is gistermiddag in ’n motorongeluk net noord van Otjiwarongo dood.

– Die Unie vir Namibiese Voedsel- en Verwante Werkers (Nafau) en die Ministerie van Handel en Nywerheid moes voor die naweek in ’n desperate poging probeer om vure dood te slaan oor die moontlike sluiting van die Rhino Garments-fabriek.



WOENSDAG 30 MAART 2005

– ’n Luukse lugskip, die tweede van ’n bestelling deur die Namibiese regering van bykans N$180 miljoen van die Bell Augusta Aerospace-maatskappy, het gisteraand in Windhoek aangekom.

– Oudpresident Sam Nujoma sal eersdaags kantore langs die huidige Staatshuis in Robert Mugaberylaan betrek, terwyl onderhandelinge op die oomblik aan die gang is om een van Windhoek se spogeiendomme aan te koop as sy stadshuis.

– Namibië se grense word sedert die naweek streng bewaak ná die uitbraak van die gevreesde Marburgsiekte in die noorde van Angola.



DONDERDAG 31 MAART 2005

– Die eerste prysskok van die nuwe finansiële jaar vir alle Namibiërs tree môre amptelik in werking wanneer die prys van grootmaat-waterlewering deur NamWater met ’n verdere 12% die hoogte inskiet.

– Die prag en praal rondom die feestelikhede van 21 Maart is agter die rug, maar bitterheid bestaan by meer as ’n duisend prisoniere in Namibiese tronke wat op die vooraand van Onafhanklikheidsdag presidensiële kwytskelding ontvang het en nog steeds nie vrygelaat is nie.

– Namibië se hoofbegroting sal eers teen die einde van aanstaande maand in die Parlement vir oorweging en goedkeuring ter tafel gelê word.



VRYDAG 1 APRIL 2005

– Legal Shield, die Namibiese reus in die regsversekering, is gister voorlopig onder kuratorskap geplaas.

– Terwyl Rhino Garments wag op die groenlig van drie van die grootste aankopers in Amerika wat hul aankope onbepaald opgeskort het, hervat die sowat 1 700 fabriekwerkers vandag hul pligte onder streng voorwaardes van goeie gedrag.

– Die Ongandjerastam het gister op die eerste Kabinetsitting onder voorsitterskap van President Hifikepunye Pohamba die grootste deel van sy tradisionele grond deur die bemiddeling van die stam se beroemdste seun en vader van onafhanklikheid, mnr. Sam Nujoma, teruggekry.