Bybelse wysheid

DR. ANNES NEL:

Matteus 6:33: "Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee."

Ek het baie vriende wat sukkel met geestesongesteldheid. As iemand wat episodes van depressie ervaar het, verstaan ek iets van hulle stryd. Een van die simptome is dat hulle voel dat hulle geen doel in die lewe het nie. Hulle voel dat hulle drome aan skerwe lê en daar nie veel van ’n toekoms is nie. Baie dikwels is hulle bekommerd en angstig oor die toekoms.

Jesus verwys in Matteus 6 na voëls en lelies. Die Here kyk na hulle. Voëls en lelies is nie geskep om te saai en te oes (tradisioneel manswerk) of om klere (tradisioneel vrouewerk) te maak nie. Die voëls en blomme moes net die doel vervul waarvoor hulle geskep is. God het die lelies mooi gemaak en sorg vir die kos van die voëls.

Met hierdie beeld beklemtoon Jesus dat dit nie ons doel is om ons oor ons lewens te bekommer nie.

Ons is bekommerd oor baie dinge. Wat gaan ons eet, drink of aantrek vir môre? Die Here het belowe dat Hy vir ons sal sorg.

Ons kan nie ons lewens met 'n enkele uur verleng nie. Ons moet lewe vir die doel waarvoor ons geskep is. Dit is om God se wil te doen en mense te wees wat sy koninkryk eerste stel.