Bybelse wysheid

DR. ANNES NEL

Eksodus 20:2: “Ek is die Here jou God wat jou. . . bevry het.”



Antoine de Saint-Exupéry het gesê die egtheid van ons liefde vir God word gemeet aan ons bereidwilligheid om ons naaste, die voorwerp van daardie liefde, te omhels.

Dit lyk asof ons dit vergeet het. Jesus sê mense sal weet dat ons sy volgelinge is as ons mekaar liefhet (Johannes 13:33,34). Jy kan nie werklik sê jy het God lief as jy nie ander liefhet nie (1 Johannes 4). Ons liefde vir God, ons verbintenis tot Christus, word die duidelikste getoon deur ons liefde vir mense.

Die Tien Gebooie herinner ons aan hierdie onbreekbare ketting. Liefde vir God bepaal ons verhoudings met geld, met mense wat ons liefhet, gesag, besittings en waarheid. Om God lief te hê, is om te gee, te deel en ander te respekteer.

God het ons bevry deur Christus. Hierdie verlossing maak ons oë oop vir nuwe maniere om God te dien. Vandag staar ons moderne kwessies in die gesig soos die regte van vroue, slagoffers van geweld, rassisme en die uitdagings van billikheid in die samelewing. Dit is goeie redes om weer oor die Tien Gebooie in ons huidige konteks na te dink.

Neem ’n oomblik om die onreg rondom jou op te merk. Daar is baie geleenthede om God se liefde deur jou dade te wys.



Vader, help my om die geleenthede te sien om U lief te hê deur ander te dien. Amen.