Die jaar van die slang
Gerhardus van Grootfontein – Die Chinese kultuur is die oudste steeds bestaande kultuur ter wêreld.
Soos die taal en sekere kosgewoontes, is die Chinese kalender ook millennia oud. Die legende lui dat die kalender uitgevind is onder keiser Huang Di in 2697 BCE. Anders as ons Westerse kalender, wat gebaseer is op die siklusse van die son, volg die Chinese kalender die fases van die maan.
Gevolglik val die Chinese Nuwejaar elke jaar op ’n ander dag. Hierdie jaar is die eerste dag van die jaar die 29ste Januarie: die jaar van die slang.
Elke jaar word gekoppel aan ’n diereriem-teken (zodiac sign) vir almal wat in hierdie jaar gebore word. Daar is 12 diere, en die diereriem neem ’n siklus van 12 jaar aan. Die orde waarin hierdie diere hulle plekke in die diereriem inneem, lê in ’n baie ou verhaal:
Die jade-keiser uit die hemele het die aardse diere vir ’n resies genooi. Hierdie resies het oor ’n vinnig vloeiende rivier plaasgevind. Die eerste 12 diere wat aan die ander kant van die rivier uitkom, sal die keiser se voogde in ons aardse wêreld wees. Op julle merke, gereed, weg!
Die diere het gestoei deur die wit waters van die rivier. Die stewige bul was die voorloper deur die sterk stroom. Die slingse rot het besef hy het geen kans in hierdie rowwe water nie, en kruip toe in die bul se oor weg. Uitgeslape het die rot uit die bul se oor gespring net voor die bul op die rivierwal aankom. So kom die rot toe eerste in die resies en word ook die eerste dier in die diereriem-siklus. Die bul kom toe tweede, die tier derde, en toe die haas, draak, slang, perd, bok, aap, haan, hond en laaste, die vark.
Hierdie 12 diere is aangestel as voogde van ons wêreld en pronk steeds elke 12 jaar as plakkaatknaap van ’n bepaalde jaar.
Volgens die Chinese het jou persoonlikheid sekere merkers en eienskappe van die dier in wie se jaar jy gebore is. Dit beïnvloed blykbaar selfs jou kanse tot sukses in die lewe. Dit is hoekom die jaar van die draak (verlede jaar) baie gewild is vir kinders kry, omdat die draak krag en outoriteit voorstel.
Die slang hou ook positiewe konnotasies in. Dis ’n dier wat geassosieer word met elegansie, insig, vernuwing en afsondering. Gooi al hierdie eienskappe bymekaar in ’n voedselverwerker en jy sit met ’n “smoothie” vir persoonlike groei en selfontdekking.
Die Chinese reken dat, soos die slang vervel, moet ons as individue die verlede laat gaan. Hierdie is nogal ’n tameletjie, want dit stel soort van voor dat ’n mens moet vergewe en aanbeweeg. Maar o weë, bitterheid en wrokke is sulke goeie geselskap. Ek voer myne allerhande lekkernye, vat hulle uit om te gaan speel in die park, en soms laat ek hulle toe om saam met my middagslapies te vat.
Ongelukkig is bitterheid en wrokke toksiese geselskap, en dit versuur ’n mens se eie lewenskwaliteit. So, om van hierdie ou vel ontslae te raak, moet ons weer na die slang kyk vir raad. Bestee tyd op jou eie. Hierdie alleentyd moenie gevul wees met Netflix of sosiale media nie, maar om insig te kweek: lees, skryf, stap, dink, kook.
Gebruik hierdie tyd om bitterheid en wrokke so saggies-saggies te smoor. Deur dit te doen, bereik ’n mens ’n punt van vernuwing.
Op Oujaarsaand (31 Desember) het ek baie lekker geëet en uit my maag uit gelag, maar geen Nuwejaarsvoornemens gehad nie. Intussen, met die Chinese Nuwejaar wat nader gekruip het, het ek besef dat dit dalk nie ’n slegte idee is om by die slang te leer nie.
– Gasskrywer
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.
Soos die taal en sekere kosgewoontes, is die Chinese kalender ook millennia oud. Die legende lui dat die kalender uitgevind is onder keiser Huang Di in 2697 BCE. Anders as ons Westerse kalender, wat gebaseer is op die siklusse van die son, volg die Chinese kalender die fases van die maan.
Gevolglik val die Chinese Nuwejaar elke jaar op ’n ander dag. Hierdie jaar is die eerste dag van die jaar die 29ste Januarie: die jaar van die slang.
Elke jaar word gekoppel aan ’n diereriem-teken (zodiac sign) vir almal wat in hierdie jaar gebore word. Daar is 12 diere, en die diereriem neem ’n siklus van 12 jaar aan. Die orde waarin hierdie diere hulle plekke in die diereriem inneem, lê in ’n baie ou verhaal:
Die jade-keiser uit die hemele het die aardse diere vir ’n resies genooi. Hierdie resies het oor ’n vinnig vloeiende rivier plaasgevind. Die eerste 12 diere wat aan die ander kant van die rivier uitkom, sal die keiser se voogde in ons aardse wêreld wees. Op julle merke, gereed, weg!
Die diere het gestoei deur die wit waters van die rivier. Die stewige bul was die voorloper deur die sterk stroom. Die slingse rot het besef hy het geen kans in hierdie rowwe water nie, en kruip toe in die bul se oor weg. Uitgeslape het die rot uit die bul se oor gespring net voor die bul op die rivierwal aankom. So kom die rot toe eerste in die resies en word ook die eerste dier in die diereriem-siklus. Die bul kom toe tweede, die tier derde, en toe die haas, draak, slang, perd, bok, aap, haan, hond en laaste, die vark.
Hierdie 12 diere is aangestel as voogde van ons wêreld en pronk steeds elke 12 jaar as plakkaatknaap van ’n bepaalde jaar.
Volgens die Chinese het jou persoonlikheid sekere merkers en eienskappe van die dier in wie se jaar jy gebore is. Dit beïnvloed blykbaar selfs jou kanse tot sukses in die lewe. Dit is hoekom die jaar van die draak (verlede jaar) baie gewild is vir kinders kry, omdat die draak krag en outoriteit voorstel.
Die slang hou ook positiewe konnotasies in. Dis ’n dier wat geassosieer word met elegansie, insig, vernuwing en afsondering. Gooi al hierdie eienskappe bymekaar in ’n voedselverwerker en jy sit met ’n “smoothie” vir persoonlike groei en selfontdekking.
Die Chinese reken dat, soos die slang vervel, moet ons as individue die verlede laat gaan. Hierdie is nogal ’n tameletjie, want dit stel soort van voor dat ’n mens moet vergewe en aanbeweeg. Maar o weë, bitterheid en wrokke is sulke goeie geselskap. Ek voer myne allerhande lekkernye, vat hulle uit om te gaan speel in die park, en soms laat ek hulle toe om saam met my middagslapies te vat.
Ongelukkig is bitterheid en wrokke toksiese geselskap, en dit versuur ’n mens se eie lewenskwaliteit. So, om van hierdie ou vel ontslae te raak, moet ons weer na die slang kyk vir raad. Bestee tyd op jou eie. Hierdie alleentyd moenie gevul wees met Netflix of sosiale media nie, maar om insig te kweek: lees, skryf, stap, dink, kook.
Gebruik hierdie tyd om bitterheid en wrokke so saggies-saggies te smoor. Deur dit te doen, bereik ’n mens ’n punt van vernuwing.
Op Oujaarsaand (31 Desember) het ek baie lekker geëet en uit my maag uit gelag, maar geen Nuwejaarsvoornemens gehad nie. Intussen, met die Chinese Nuwejaar wat nader gekruip het, het ek besef dat dit dalk nie ’n slegte idee is om by die slang te leer nie.
– Gasskrywer
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.
Kommentaar
Republikein
Geen kommentaar is op hierdie artikel gelaat nie