Die Super Bowl en ’n spioenasie-lugballon

Al waarop die Amerikaanse nuuskanale die afgelope twee weke fokus, is op twee geleenthede – die jaarlikse Super Bowl en die vreemde Chinese lugballon wat ongehinderd oor die vasteland beweeg en glo intelligensie-data onwettig ingesamel het.Kom ek begin by die vreemdste een van die twee en dalk die eerste konkrete bewyse van die beweerde Koue Oorlog tussen Amerika en China. Dit is waarskynlik die twee lande met die meeste mag in die wêreld en daarom is dit geen verrassing dat hulle ’n ogie oor mekaar wil hou nie.Volgens die berigte wat ek hier in Amerika lees en luister, het China ’n spioenasie-lugballon in Amerika se lugruimte ingestuur. Dié lugballon het glo sy pad oor so te sê die hele land gemaak voordat Amerikaanse magte dit uiteindelik afgeskiet het. Ouman Biden het heelwat kritiek ontvang oor die opdrag wat volgens sommige té laat gekom het, maar hulle moes glo wag tot die lugballon oor die see was voor hulle dit veilig kon afskiet.Die spioenasie-ballon het na bewering klaar sy sending voltooi voordat dit vernietig is, volgens berigte. Ek sien duidelik in my geestesoog hoe die Chinese saam-saam giggel terwyl die Yankees skarrel. Aan die anderkant weet ’n mens in elk geval nie wat jy van internasionale nuus kan glo nie. Inligting word verdraai, persepsies word geskep, en oorloë ontstaan. Ek kies eerder nie kante nie. Die tweede geleentheid is die Super Bowl. Ek dink die Amerikaners se aandag is meer op die Super Bowl as die vreemde lugballon gevestig.Indien jy nie weet nie – die Super Bowl is die Amerikaanse ‘football’-finaal en sekerlik die grootste sportgeleentheid in Amerika. Sommige Amerikaners dink wel dit is die grootste geleentheid in die wêreld. Hulle besef nie dat daar ander lande en vastelande bestaan wat nie eens weet wat die National Football League (NFL) is nie. Die sport is soos rugby, net baie minder opwindend. Hulle stop elke twee minute en die wedstryd duur maklik langer as twee ure.Daar is gerugte dat die Super Bowl “scripted” is - vooruit geskryf en beplan is. Basaar? Ek weet. Maar ná daai wedstryd is selfs ek nogal skepties. Die gunstelingspan om te wen MVP se Patrick Mahomes – wat waarskynlik nou die beste speler in die liga is – beseer sy enkel in die eerste helfte. Hy hinkepink dramaties van die veld af en halftyd loop sy span agter. Tweede helfte is hy egter volstroom terug op die veld en lei sy span tot ’n 10 punte oorwinning.Die grootste opwinding was natuurlik die halftyd-konsert en hierdie jaar het nie teleurgestel nie. ’n Kunstenaar van formaat – Rihanna – het vrou-alleen 70 000 ondersteuners op die punte van hul stoele gehou en die res van die wêreld oopmond gelaat. Feminisme is ’n ou storie, ek weet, maar dit het my bemagtig laat voel. Dit het ’n groter indruk op my gemaak as Snoop Dogg en Eminem, dis vir seker.* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Die Super Bowl en ’n spioenasie-lugballon

Kommentaar

Republikein 2025-04-10

Meld asseblief aan om kommentaar te lewer

Die Super Bowl en ’n spioenasie-lugballon

Kommentaar

Republikein 2025-04-10

Meld asseblief aan om kommentaar te lewer

MELD AAN

Advertensie