Ek sê maar net - ‘n Moeilike takie dié!
Gene Travers
DIT gebeur dikwels dat mense my vra om as beoordelaar by die een of ander kompetisie op te tree en my antwoord is gewoonlik 'n besliste 'nee'.
Maar nou onlangs praat 'n mooi vrou my om om as beoordelaar by 'n kunskompetisie vir kinders op te tree.
Die beoordeling het nog skaars begin, toe wou ek vinnig om 'n paal hardloop en myself onder die sitvlak skop, sou ek myself kon inhaal. En ek het hoog en laag gesweer dat ek myself nooit weer in so 'n situasie sou laat beland nie.
Ek is nou maar net eenmaal 'n persoon wat nie ander mense, en veral hul talente, kan beoordeel nie.
Om mense se kunswerke, hoe oud die kunstenaars ook al mag wees, te beoordeel, is een van die moeilikste dinge ter wêreld, glo ek. Wat vir een mens na kuns mag lyk, kan vir 'n ander man na snert lyk. En wat vir een man na snert lyk, kan vir 'n ander man na kuns lyk.
Om kuns te beoordeel, moet jy eintlik weet hoe die kunstenaar gevoel het die oomblik toe hy die kwas teen die doek gedruk het. Ek wil en sal myself nooit weer daarvoor inlaat om een jong kunstenaartjie se kuns teen 'n ander se werk op te weeg nie.
Verlede week kom praat Carol Kotze my wragtie weer om om as beoordelaar by die Country-musiekkonsert in Windhoek op te tree en daar sit ek weer!
Sou dit van my alleen afhang, het ek al 19 deelnemers laat eerste kom. En op die ou end sit ek met musiekkunstenaars soos Wimpie Duvenhage, André Havenga, Leon Jacobs, Daantjie Louw, Laurie Raaths, Esmé Tolken, Nico Wentzel, Desmond Breedt en Alwyn Smith -- maar net een van hulle mag eerste kom!
Nou weet ek ook hoe voel beoordelaars by skaapbraai- en potjiekoskompetisies. Om van beoordelaars by skoonheidskompetisies nie eens te praat nie.
Dit is ook maar 'n goeie ding dat daar meer as een beoordelaar by sulke kompetisies optree, want ek glo dat as daar net een was, hy halfpad deur die verrigtinge selfmoord sou gepleeg het.
Ek is nou bang om selfs oor die weer te besluit. Ek wil nie waag om te sê of dit warm of koud is nie, want ek kan dalk net verkeerd wees.
Dit is natuurlik nodeloos om te sê dat ek nooit weer gaan inwillig om as beoordelaar by kompetisies op te tree nie, al is die stemmetjie wat my vra hoe mooi.
'n Mens kan darem met 'n oop gemoed die organiseerders van die Country-byeenkoms volpunte gee vir hul poging - en ek praat spesifiek van Carol Kotze, Yvonne en Johnnie Wild en die Country Jam Band.
Nou weet ek ook nie wie die beoordelaars gaan wees om te besluit wie in die sop is oor die toestand van die polisiebarakke in Windhoek nie. Dis nou nadat 'n berig met foto's in gister se uitgawe van die Republikein verskyn het oor die walglike omstandighede waaronder polisiemanne daar leef.
Dit smaak my daar is 'n groot geskarrel in die duiwehok soos gesoek word vir beoordelaars, maar niemand wil inwillig vir dié taak nie.
Miskien kan die minister van binnelandse sake die doek om sy oë afhaal, dit om sy neus en mond bind en self gaan oordeel. Neem tog net vir u eie onthalwe 'n emmer saam, u Eksellensie. U gaan dit nodig kry! - 6 Julie 1994
DIT gebeur dikwels dat mense my vra om as beoordelaar by die een of ander kompetisie op te tree en my antwoord is gewoonlik 'n besliste 'nee'.
Maar nou onlangs praat 'n mooi vrou my om om as beoordelaar by 'n kunskompetisie vir kinders op te tree.
Die beoordeling het nog skaars begin, toe wou ek vinnig om 'n paal hardloop en myself onder die sitvlak skop, sou ek myself kon inhaal. En ek het hoog en laag gesweer dat ek myself nooit weer in so 'n situasie sou laat beland nie.
Ek is nou maar net eenmaal 'n persoon wat nie ander mense, en veral hul talente, kan beoordeel nie.
Om mense se kunswerke, hoe oud die kunstenaars ook al mag wees, te beoordeel, is een van die moeilikste dinge ter wêreld, glo ek. Wat vir een mens na kuns mag lyk, kan vir 'n ander man na snert lyk. En wat vir een man na snert lyk, kan vir 'n ander man na kuns lyk.
Om kuns te beoordeel, moet jy eintlik weet hoe die kunstenaar gevoel het die oomblik toe hy die kwas teen die doek gedruk het. Ek wil en sal myself nooit weer daarvoor inlaat om een jong kunstenaartjie se kuns teen 'n ander se werk op te weeg nie.
Verlede week kom praat Carol Kotze my wragtie weer om om as beoordelaar by die Country-musiekkonsert in Windhoek op te tree en daar sit ek weer!
Sou dit van my alleen afhang, het ek al 19 deelnemers laat eerste kom. En op die ou end sit ek met musiekkunstenaars soos Wimpie Duvenhage, André Havenga, Leon Jacobs, Daantjie Louw, Laurie Raaths, Esmé Tolken, Nico Wentzel, Desmond Breedt en Alwyn Smith -- maar net een van hulle mag eerste kom!
Nou weet ek ook hoe voel beoordelaars by skaapbraai- en potjiekoskompetisies. Om van beoordelaars by skoonheidskompetisies nie eens te praat nie.
Dit is ook maar 'n goeie ding dat daar meer as een beoordelaar by sulke kompetisies optree, want ek glo dat as daar net een was, hy halfpad deur die verrigtinge selfmoord sou gepleeg het.
Ek is nou bang om selfs oor die weer te besluit. Ek wil nie waag om te sê of dit warm of koud is nie, want ek kan dalk net verkeerd wees.
Dit is natuurlik nodeloos om te sê dat ek nooit weer gaan inwillig om as beoordelaar by kompetisies op te tree nie, al is die stemmetjie wat my vra hoe mooi.
'n Mens kan darem met 'n oop gemoed die organiseerders van die Country-byeenkoms volpunte gee vir hul poging - en ek praat spesifiek van Carol Kotze, Yvonne en Johnnie Wild en die Country Jam Band.
Nou weet ek ook nie wie die beoordelaars gaan wees om te besluit wie in die sop is oor die toestand van die polisiebarakke in Windhoek nie. Dis nou nadat 'n berig met foto's in gister se uitgawe van die Republikein verskyn het oor die walglike omstandighede waaronder polisiemanne daar leef.
Dit smaak my daar is 'n groot geskarrel in die duiwehok soos gesoek word vir beoordelaars, maar niemand wil inwillig vir dié taak nie.
Miskien kan die minister van binnelandse sake die doek om sy oë afhaal, dit om sy neus en mond bind en self gaan oordeel. Neem tog net vir u eie onthalwe 'n emmer saam, u Eksellensie. U gaan dit nodig kry! - 6 Julie 1994
Kommentaar
Republikein
Geen kommentaar is op hierdie artikel gelaat nie