En skielik is dit winter

Eers was daar die bloedige warm dae in die eerste deel van Namibië se somer. Temperature het in die groot nommers geboer en sommige mense het gedink hulle mag dalk doodbrand. Party het selfs voorbereidings begin tref vir ingeval hulle dit nie deur daardie vuurwarm dae sou maak nie. Ons het almal gerugte van swaar reënval gehoor, maar soos dit in die aard van die gemiddelde Namibiër is, was ons almal skepties. Ons het té veel kere van reën gehoor wat ons nooit te siene gekry het nie. Buitendien het dit lankal vir ons gevoel of hierdie doodbrand droogte geen einde sou hê nie. Die hoopvolles is egter nie deur die hoop beskaam nie.Die dag en datum is nou nie meer so duidelik in my geheue nie, maar toe eensklaps het die groot reën begin. Eers het dit weekliks en toe daagliks gereën.Mense het lofgebede van groot vreugde gebid en die dankbare harte het oorgeloop, net soos die reënmeters. Toe begin dit vir weke aaneen reën – dag en nag – maar almal was steeds gelukkig en sommige was later selfs tevrede, want almal en alles wat water hier in my wêreld nodig gehad het, het dit ontvang. Plek-plek was daar vloedskade as gevolg van oorstromings, maar mense het nie gewaag om daaroor te loop en kla nie.Ek is nie so seker oor hoeveel reën die boere in die Noorde en Suide gehad het en of hulle darem al kan sien of hulle sal deurkom met water of nie.Hier in Windhoek en omgewing het sommige riviere se walle oorstroom, damme het naderhand vol geword en sommige het oorgeloop. Daarna het dit nog so af en toe gereën. Nou kry ons nog een maal per week reën, maar dit lyk of dit einde se kant toe staan.Hier oor die Paasnaweek was die aande ietwat koeler, veral na sononder, maar na 10 soggens was die truitjies ook nie meer nodig nie. Ek het vermoed die Pase mag dalk koud wees, maar na my mening was dit maar net koelerig. Maandagaand was daar toe weer so ’n ligte donderstorm, maar dit het darem ook nie heelnag aangehou nie.Die temperatuur Dinsdagoggend was so ’n tikkie kouer op die vel, maar ook nog nie koud genoeg vir ’n jas nie. Dinsdagaand was heel moontlik die keerpunt, want gisteroggend was dit eensklaps winter. Dit het in elk geval vir my so gevoel. Waar ek in Avis bly, kry ons meestal eerste koud nog voor die winter in volle swang kan kom. So het ek gisteroggend uit my warm bed in my klere ingespring want die koel lug het skielik vir my koud gevoel. Ek is nog steeds nie in ’n jas geklee nie, maar ek sal seker maar vanaand die winterklere moet uitpak, want ek dink dit is nou skielik winter.Die kanse is egter nog goed dat ek nou met die naderkruipende ouderdom skielik gouer koud gaan kry, maar ek weet nie so seker of ons nog werklik warmer dae sal beleef nie, nie tot en met September nie.Maar niemand sal my betrap dat ek begin hoop dit reën nie hierdie winter nie. Skielik of te not, in hierdie land wens ’n mens so nimmer as nooit die reën weg nie. – audreyvanderwes@gmail.com* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

En skielik is dit winter

Kommentaar

Republikein 2025-04-24

Meld asseblief aan om kommentaar te lewer

En skielik is dit winter

Kommentaar

Republikein 2025-04-24

Meld asseblief aan om kommentaar te lewer

MELD AAN

Advertensie