Idiome vol drome
Wiesie Kotzé – Nou die aand trek ons seuntjie die Kobus Galloway-boek (hy is die skepper van die Idees vol vrees-reeks) nader en vra dat Mamma vir hom moet voorlees wat op elke lawwe illustrasie aangaan – elkeen beeld ’n Afrikaanse idioom uit.
Hy skaterlag by baie van hulle en maak verwarde geluide by sommige van die illustrasies. Dit het my die idee gegee om te kyk of ek van daardie lawwigheid kan probeer oordra, ongelukkig in woorde en sonder die lawwe illustrasies.
Ek gaan met die deur in die huis val (en probeer om nie tydens die val seer te kry nie), en vir julle vertel ek het reeds die kat uit die boom gekyk. Ek het so lank gekyk tot die kat letterlik uitgeval het. (Dankie Kobus vir die lagwekkende illustrasie).
Ná die sakke sout wat ons as gesin die afgelope jaar saam opgeëet het, gaan ek begin skouer aan die wiel sit om aan te hou om vir julle lekker leesbare stories te skryf. Julle mag dalk dink ek is te groot vir my skoene (soos my vierjarige dit soms regkry). Maar ek is ’n regte ou korrelkop wat maak nes ek goeddink. Dis ’n feit soos ’n koei en ek bly koel soos ’n komkommer as enigiemand vir my dalk kritiek wil stuur.
Om my man se gunsteling-idioom te gebruik – ek gooi ’n klip in die bos en wil graag hoor wat al die lesers tot dusver oor vanjaar dink.
Daar was politieke hofsake wat eenvoudig uitgegooi is, ons sal hierdie jaar stadig oor die klippe moet beweeg, maar oor sal ons moet oor.
Sover reën dit nog net katte en honde (en ons hoop dit hou nog vir lank so aan). Om nog ’n gunsteling van my man te gebruik, gaan ek oop kaarte met julle speel en sê die jaar is nog jonk. Ek dink wêreldwyd is daar allerhande slange in die gras en daar waar oorlog in die wêreld heers, het een of ander leier ’n skroef los.
Die wêreld waarin ons lewe is in interessante tye, die dat bekende supermarkname nou terugval op ou “modelle”. Hulle het beslis probeer om die publiek se oog te vang.
Ek glo die meeste politici is wolwe in skaapsklere, maar hoop iemand kom met die hele sak patats na vore oor wat presies die plan is met ons opkomende vrouepresident van die land.
Nou toe, voor ek julle ore van julle koppe af praat, en iemand ’n prys op my kop sit oor die aantal idiome per lettergreep in hierdie skrywe, gaan ek in die pad val. (Nog ’n prentjie wat heerlike skaterlag in my vierjarige ontlok het – arme tannie met haar pêrels en haakskoene wat daar in die pad lê).
Ek wil net noem wanneer jou vierjarige aan die einde van ’n aand se lawwigheid vir jou sê “ek vat nou die pad”, pomp ’n ma se hart van trots vir sulke vroeë taalvaardighede. En hoop vir die oorlewing van goeie Afrikaans in die toekoms.
– Gasskrywer
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.
Hy skaterlag by baie van hulle en maak verwarde geluide by sommige van die illustrasies. Dit het my die idee gegee om te kyk of ek van daardie lawwigheid kan probeer oordra, ongelukkig in woorde en sonder die lawwe illustrasies.
Ek gaan met die deur in die huis val (en probeer om nie tydens die val seer te kry nie), en vir julle vertel ek het reeds die kat uit die boom gekyk. Ek het so lank gekyk tot die kat letterlik uitgeval het. (Dankie Kobus vir die lagwekkende illustrasie).
Ná die sakke sout wat ons as gesin die afgelope jaar saam opgeëet het, gaan ek begin skouer aan die wiel sit om aan te hou om vir julle lekker leesbare stories te skryf. Julle mag dalk dink ek is te groot vir my skoene (soos my vierjarige dit soms regkry). Maar ek is ’n regte ou korrelkop wat maak nes ek goeddink. Dis ’n feit soos ’n koei en ek bly koel soos ’n komkommer as enigiemand vir my dalk kritiek wil stuur.
Om my man se gunsteling-idioom te gebruik – ek gooi ’n klip in die bos en wil graag hoor wat al die lesers tot dusver oor vanjaar dink.
Daar was politieke hofsake wat eenvoudig uitgegooi is, ons sal hierdie jaar stadig oor die klippe moet beweeg, maar oor sal ons moet oor.
Sover reën dit nog net katte en honde (en ons hoop dit hou nog vir lank so aan). Om nog ’n gunsteling van my man te gebruik, gaan ek oop kaarte met julle speel en sê die jaar is nog jonk. Ek dink wêreldwyd is daar allerhande slange in die gras en daar waar oorlog in die wêreld heers, het een of ander leier ’n skroef los.
Die wêreld waarin ons lewe is in interessante tye, die dat bekende supermarkname nou terugval op ou “modelle”. Hulle het beslis probeer om die publiek se oog te vang.
Ek glo die meeste politici is wolwe in skaapsklere, maar hoop iemand kom met die hele sak patats na vore oor wat presies die plan is met ons opkomende vrouepresident van die land.
Nou toe, voor ek julle ore van julle koppe af praat, en iemand ’n prys op my kop sit oor die aantal idiome per lettergreep in hierdie skrywe, gaan ek in die pad val. (Nog ’n prentjie wat heerlike skaterlag in my vierjarige ontlok het – arme tannie met haar pêrels en haakskoene wat daar in die pad lê).
Ek wil net noem wanneer jou vierjarige aan die einde van ’n aand se lawwigheid vir jou sê “ek vat nou die pad”, pomp ’n ma se hart van trots vir sulke vroeë taalvaardighede. En hoop vir die oorlewing van goeie Afrikaans in die toekoms.
– Gasskrywer
– [email protected]
* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.
Kommentaar
Republikein
Geen kommentaar is op hierdie artikel gelaat nie