Kophou, die einde van die jaar is in sig

Wiesie Kotzé – Hierdie tyd van die jaar kla almal. Te besig, te haastig, te veel druk. Stemdag is ook nog boonop om die draai (darem ’n bonus-vakansiedag), maar as ’n mens nie die nodige tyd neem om jou strategie vir stemdag agtermekaar te kry nie, is selfs daardie vakansiedag vermoeiend. En dit is waarop hierdie tyd van die jaar neerkom. Als moet nou vinnig gebeur en telkemale word die nodige voorbereiding nie gedoen nie. Die druk vloei deur in bestuursgedrag – al hoe meer bestuurders wat eenvoudig oor rooi verkeersligte ry of roekelose kanse neem. Of selfs ry wanneer die verkeerslig al groen is en die aankomende verkeer reeds vloei.Ek lees nou die dag ’n artikel wat deur David Bishop geskryf is, wat soms nog op RadioWave gehoor kan word, oor die groot aandagkrisis.Hy vertel terwyl hy die artikel skryf waarin hy berig oor die onderwerp van ’n afname in fokus by homself, is sy rekenaar op drie verskillende Google Chrome-profiele oop, elkeen met veelvoudige “tabs”. Drie verskillende Excel-dokumente is oop asook twee Word-dokumente (insluitend die dokument waarop hy gewerk het), ’n bykomende PDF-dokument met Outlook, WhatsApp Web en ’n file manager-funksie wat ook oop is. Boonop het hy twee selfone wat reg langs hom lê terwyl hy werk. Hy sê, in die lig van die omstandighede, behoort hy seker nie verbaas te wees dat sy aandagspan besig is om te krimp nie, omdat hy sy konsentrasievermoë oplei om so te wees.Gister was ’n uitsondering gewees in my lewe, maar om drie verskillende vergaderings in te ryg voor die middaguur, met ’n vierdie een net na die middaguur, is uitputtend en dit alleen slegs op papier. Verreken dan nog die stres, adrenalien en energie-insette in van wat daardie vergaderings elkeen verg. Maar ja, dis hoe dit hierdie tyd van die jaar gaan, dit help nie ons kla daaroor nie. Ek het die laaste paar jaar oor aandagspan en afleibaarheid opgelees en die feite is baie interessant. Ons is stadig maar seker besig om in die tye waarin ons lewe – met al die toestelle en dinge wat ontwerp is om ons aandag te trek – die versadigingspunt van prosessering te bereik. Die brein kan tot en met 100 miljard “operasies” per sekonde uitvoer. Wat ’n indrukwekkende syfer is. Maar daar is beperkings oor hoeveel ons werklik van daardie operasies kan verwerk en die beperkings is energieverwant. Omdat ons net soveel energie kan metaboliseer en na die brein se “verwerkingsaanleg” stuur (bioloë kruisig of korrigeer my asb., hierdie is nie my sterkste veld nie), is ons beperk tot hoeveel inligtingsbrokkies ons kan verwerk van die baie inligting wat in ons rigting gegooi word. O ja, het julle geweet dat die brein die meeste energie van al ons organe gebruik naas die vroulike voortplantingstelsel? Die natuur weet waarheen watter energie moet gaan om ons voortbestaan te verseker.Sulke feite, soos die feit dat die menslike brein soveel as 74 GB se inligting per dag in rekenaartaal verwerk, laat my altyd dink dat ons as menslike spesie nie noodwendig weet wat goed is vir ons nie. Dis die ekwivalent van 16 flieks se data. Die inligting word onder meer ingeneem deur rekenaars, selfone, tablette en advertensieborde. En elke jaar word dié persentasie hoër.As jy die tyd het of neem om ’n koerantartikel soos hierdie een hierdie tyd van die jaar te lees, wil ek jou gelukwens. Die tyd van die jaar vereis baie van baie van ons, en om motorongelukke te verhoed en ’n koelkop te probeer hou is my persoonlike strategie (geleer by die ADHD-gemeenskap) om liewer minder as meer te doen. Jy hoef nie elke funksie by te woon nie (alhoewel baie funksies hierdie jaar ook verpligtend is).Jy hoef nie elke werksgeleentheid te aanvaar nie, alhoewel die druk daar is om al hoe meer te neem – mens weet mos nie wanneer ’n pandemie ons weer gaan tref nie. Inteendeel, ek het respek vir diegene wat kan sê – jammer ons neem nie verdere opdragte tot volgende jaar nie.As jy voel jy gee nie tans genoeg aandag aan als op alle fronte van jou lewe nie, dan glo ek dit gaan met jou soos met die res van die samelewing. En as jy ’n oomblik kan neem te midde van al die vereistes om na jou behoeftes te luister vir sosiale interaksie, funksies en geleenthede dan sal jy ook begin raaksien dat daar allerhande funksies in die samelewing afgestel word weens beskikbaarheid en belangstelling van diegene wat dit moet bywoon. Aan die wat reeds by hulself ingeloer het en weet waar hulle staan – geluk. Aan die res van ons wat nog stoei om die balans hierdie tyd van die jaar te vind – sterkte en hou kop!– Gasskrywer – lane.lwenhold@gmail.com* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Kophou, die einde van die jaar is in sig

Kommentaar

Republikein 2024-11-21

Meld asseblief aan om kommentaar te lewer

Kophou, die einde van die jaar is in sig

Kommentaar

Republikein 2024-11-21

Meld asseblief aan om kommentaar te lewer

MELD AAN

Advertensie