Ons taal

Waar is die dae toe my dogtertjie opgewonde na die “wingie” in die tuin wys? Nou word klei-wurmpies in haar vaardige kleuterhandjies gerol en Afrikaans rol vindingryk van haar bykans drie-jarige tongetjie af. Ek dink nostalgies aan al die koddige woordjies waarvan “happoot” vir hardloop, en “skappertjie” vir “skoenlappertjie” die enigste bittereinders is. Maar nou verlustig ek my in haar nuutskeppings wat ŉ venster is tot haar wêreldbelewenis en denke. “Boudstert”, haar eerste nuutskepping, verwys na ŉ eend se stert wat lyk op iets tussen ŉ boud en ŉ stert. Sedertdien het sy my hart vermurwe toe sy vra of sy die “huilspoegies” van my wange kan afvee, en daarmee was sy sommer die sonstraal in my bewolkte dag.Daarenteen, sal ek erken, was ek effens verontwaardig toe sy die water wat ek vir haar aanbied wegstamp, want sy wil “gaan-haal-water” hê! Ek was ook effe verleë toe sy heel akkuraat my “supertube” vertaal met “waterglyplank’” (ja, ek weet, ek verdien om my eie medisyne te sluk!). Taal is dit waarmee ŉ mens dink en sinmaak van ons werklikheid. Dít is net weer bewys toe sy onlangs deur ŉ ou National Geographic-tydskrif blaai en afkom op ŉ foto van ŉ Model T Ford wat met hout in ŉ mobiele kerk omskep is sodat slegs die groot speekwiele uitsteek – dadelik sê sy: “Mamma, kyk, hier is ŉ koetskerk!” Hoewel ek treur oor die koddige babawoordjies wat plek maak vir die regte woorde, noudat selfs die r’e begin aantree, straal my Afrikaanse hart egter wanneer ek sien hoe Afrikaans klei word in daardie handjies. Dit gee my hoop dat Afrikaans veilig in my kind se hande is. Haar Afrikaans is ŉ sprekende bewys van hoe lewendig en onbeperk die taal in die monde van sy sprekers is. Dit is so ŉ voorreg om te sien hoe moedertaalvaardigheid ŉ kind kan bemagtig om sy wêreld te begryp, ontsluit en verwoord.Annika van der LindeVakgroep AfrikaansUniversiteit van Namibiëavanderlinde@unam.na

Ons taal

Kommentaar

Republikein 2025-04-03

Meld asseblief aan om kommentaar te lewer

Ons taal

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie