Ons taal

Ek voel hoe dit nader kom, die lieflike s’e. . . somervakansie, seelug, sonbaai. In my geval is laasgenoemde letterlik slegs enkele minuutjies, anders verander dit na sonbraai! En dan is dit bad in ballistol en bly net binneshuis tot my pienk velletjie my weer toelaat om in die branders te baljaar. Maar ek bly baie lief vir ons son wat gesag afdwing.

Ek onthou hoe ek jare gelede met misnoeë gekyk het na die ligpienk balletjie in die Belgiese lug. Dis daar waar ek besef het dat ek in my land hoort waar die son sy regmatige plek in die lug en op ons vlag vol staan. As ek daar doer sou bly, sou ek spreekwoordelik in my eie son staan, met ander woorde, ek sou my eie vooruitsigte benadeel. Om eerlik te wees, ek dink dat dit mettertyd selfs my dood sou kon beteken.

Dan sou die mense kon sê haar son is ondergegaan. Ja, ek weet by ons is dit vreeslik warm, en veral smiddae voel dit asof die son stilstaan. Só moet ons elkeen maar kies wat ons verkies, en nie afgunstig wees of ander niks gun nie.

Van ’n afgunstige persoon kan mens sê “Hy kan nie sien dat die son in ’n ander se water skyn nie.” Dit kan ’n mens nogal kwaad maak, maar ons het ook die (Bybelse) spreekwoord wat maan dat ons nie die son oor ons boosheid moet laat onder gaan nie.

Ja, maak maar liefs vrede voor dit te laat raak en die son water trek. Het jy geweet dat hierdie uitdrukking ook gebruik kan word wanneer dit lyk of dit gaan reën?

Oe, mag dit tog reën!



Petronella F Genis

[email protected]

Vakgroep Afrikaans

Universiteit van Namibië



* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.