Ons taal

Wêreldmoedertaaldag, ook bekend as Internasionale Moedertaaldag, is ’n dag wat wêreldwyd jaarliks op 21 Februarie gevier word.

Hierdie inisiatief is gestig met die doel om veeltaligheid te bevorder en die diverse ontwikkeling van tale te beklemtoon. Vanjaar se tema is: Laat moedertaal tot sy reg kom.

Alle moedertale het die reg om bewaar te word, om lewend gehou te word, om uitgelééf te word. Afrikaans is mý moedertaal. Dis die taal waarin ek eerste geluide, stemme, musiek en natuurlik stories gehoor het. Dis die taal waarin ek leer lees het, leer skryf het, leer dink het, leer onthou het. Dis die taal waarin ek droom. Daagliks.

Vandag is ek dankbaar en bevoorreg om te kon skoolgaan én studeer in my moedertaal, maar ook om nou daarin te kan werk en ander in my moedertaal te kan onderrig – selfs al is dit nie hulle moedertaal nie.

Op dae soos vandag put ek ook eindelose genot daaruit om te lees wat ander oor moedertaal kwytraak en die volgende het vir my uitgestaan. . .

Uit Bruno Andries se digterspen:



(Vandag is Wêreldmoedertaaldag)



Afrikaans is nie my eerste taal nie

Afrikaans is nie my tweede taal nie

Afrikaans is, streng gesproke, my sewende taal

Ek het eers Nederlands geleer

toe Frans, Latyn, Grieks, Duits en Engels

Afrikaans is nie my moedertaal nie

Sy is nie my stiefmoedertaal nie

Sy is my pleegmoedertaal

my koestertaal

my hartstaal

my liefdestaal

my aanneemma

wat my op die rype ouderdom

van een-en-twintig

onder haar vlerk geneem het

en mondig gemaak het



En hoe wyle Breyten Breytenbach oor moedertaal in sy gedig, die tongvervreemding, praat:

Wanneer jy die moedertong

In my hart laat verdor

Neem jy die wêreld weg

Verduister jy my geheue...

Ek hoop dat welke moedertaal jy besig, jy dit sal laat aanhou voortleef en die bestaan daarvan spesiaal vandag vier.



Elzeth Harmse

Afrikaansonderwyseres

[email protected]