Onthou die knypie sout

Gene Travers – Die Rothmans July met ’n prysgeld van R1 miljoen word Saterdag weer op Greyville in Durban oor 2 200 meter beslis en in Windhoek word wenke vir die wenner reeds druk in koffiekroeë, regte kroeë, kantore en op straat uitgeruil en bespreek.Die slim manne het ook reeds elke perd se stamboom uitgewerk en hulle ken sy ouma en oupa, ma en pa, oom en tante en neef en niggie asof dit hul eie familie is.Hulle ken elke perd se gewig, die grootte van sy longe, die lengte van sy tande en die manier wat hy sy stert swaai. Ook die jokkies se agtergrond en private lewens is nie meer ’n geheim nie en sommige wedders weet meer van die manne se private lewens as hulleself.Dan is daar ook die ouens wat nie al dié moeite gedoen het nie en sommer die wenperd se naam uit ’n ander perd se bek gehoor het.Ons hier by die koerant het lankal geleer om nie “hot tips” vir perde wat die July gaan wen, uit te deel nie.Ek kan onthou een jaar het ek elkeen van my kollegas op die redaksie vir ’n wenk gevra en dié manne se wenke agter hul name in die rubriek aangekondig.Ongelukkig het nie een van ons daardie jaar die perde en hul jokkies se geskiedenisse nageslaan of wenke uit ander perde se bekke gehoor nie – met die gevolg dat nie een van ons perde in die eerste drie plekke by die wenpaal verby gehardloop het nie.Dieselfde aand het ons telefone begin gons en ek is seker daarvan dat as die doodstraf nie in daardie stadium nog van toepassing was nie, ons almal voor die einde van die naweek reeds doodgeskiet, verwurg of met byle doodgekap sou gewees het. Een omie het my oor vuurwarm geskreeu oor die perd wat ek “getip” het, want hy het sy maand se salaris op dié perd verwerd. Hy wou my met alle geweld kom haal om aan sy vrou te verduidelik waarom sy vir die res van die maand op pap en wors moes leef. Ek het geprobeer om vir die omie te verduidelik dat ek in dieselfde penarie oor dieselfde perd sit, maar dit het op dowe ore geval. Ek het ook vir die res van die week met ’n donkerbril en ’n hoed deur Windhoek se strate geloop. Nou het ek vanjaar weer ’n “hot tip” vir Saterdag se July gekry, maar ek wil dit baie duidelik stel dat dit nie van my kom nie. Hans Eerenstein sê vir my Vesta is die perd wat los voor gaan hardloop. Ek wil dit net weer beklemtoon dat Hans so gesê het en nié ek nie. Hy het in elk geval vir Strongbow om hom te beskerm as dié perdjie laaste hardloop. – 30 Junie 1993

Onthou die knypie sout

Kommentaar

Republikein 2025-04-07

Meld asseblief aan om kommentaar te lewer

Onthou die knypie sout

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie