Strooikussings en antieke stoele

Augustus is glo Vrouemaand. Wat ’n toeval - die maand met woeste winde wat vuilmaak, maar eintlik skoonmaak vir die lentebloeisels.

Nou toe, daar het julle dit – ’n vroumens kan net so ’n lopende kontras wees. Mans reken mos ons het ’n “alle seisoen-gemoed” in een dag. Klink dan nou soos kinderkots ná ’n Krismisete!

Maar dis nie ons skuld nie. Dit was die meesterplan dat ons geslag trippelporsie emosies moes kry. Daardie spesiale aanvoeling/intuïsie. Daardie oë agter die kop, mikro-sensore op die krop, armhare wat orent staan as jy in ’n negatiewe energieveld is. ’n Ma moet kan aanvoel as haar kind in gevaar is.

Ja, beslis die meesterplan dat mans 40% minder emosioneel moet wees; hoe anders sou hy ’n bok kon skiet en terselfdertyd die reuk van wildsvleisbredie kry? Hoe sou hy weer ’n kind kon produseer as hy 99% van vroulief se kraampyne kon voel?

Adam se hartsnare mag nie te veel met die brein gekonnekteer wees nie.

Maar met dot-kom se vininge pas moes vrouens gelykop werkend bly om brood op die tafel te kry.

Die perfekte meesterplan kry ’n hewige knou. Man reken toe die vrou is sy gelyke en dat haar emosionele kraantjie effens gaan toedraai. Dis leeuwêreld - vroulief moet gewoond raak aan koue skouers.

Aikôna, ongeag van jare se evolusie bly Eva se hormone/emosies fynbesnaard.

Ek gooi ’n klippie in die bos, en hoe verstommend om te hoor dat vrouens dwarsdeur grense van ouderdom, beroep en kultuur dieselfde smagtinge het. Ons soek nie ’n herdenkingsring nie. Ons soek jou aandag, jou warmte, wil die lag in jou oë indrink. Verdomp, mansmens!

So, maak ek ’n lys van hoe vrouens ná vyf jaar se getroude lewe voel:

• Suurstoftenk; iets wat daar moet wees vir oorlewing

• Antieke stoel; ’n spogstuk/statussimbool in die hoek – niemand sit daarop nie

• Strooikussings; net ’n nuttelose versiering

• Vertoonkas; met ornamente en troumemorabilia – stof vergaarders!

• Spaarknope; in ’n banksakkie maar word beswaarlik gebruik

• Kirby; moet alles doen, maar staan verlate, oninteressant in die waskamer (word selde gebruik)

• Die ruitveër; ’n motoriese heen-en-weer funksie (negeuur tot vyfuur by die werk, na-ure weer aan die werk by die huis – hubby is by die gym of in ’n vergadering)

En die Grammy gaan aan ... die weggooidoekie! Ná jare se stront word jy altemit weggegooi op 50.

Nou toe dames, sluk daai trane. Magie in (of draai die astrante deeg vas), skouers op en raak besig verby die grense van jou daaglikse kantoorwerk en huistake. Raak smoorverlief op jouself, sing vir jouself in die spieël (oeps, nou klink ek soos Miley Cyrus).

Leef jou passie uit, al moet jy vir ’n paar dae staak - gelukkig het ons Hungry Lion en kitsnoedels.

Laat hulle Google inspan vir ’n paar dae se oorlewing.

Jy kan net volwaardig vrou wees as jy die meisiekind binne jou omhels en eerste stel. En, in Vadersnaam, vergeet van Mrs Jones langsaan - jy is spesiaal soos jy is!

Toodles! Geseënde Vrouemaand!

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.