Sê maar net - Augetto Graig Wonders, groot en klein

Augetto Graig ([email protected]) - Wonders, groot en klein

Vandag is die agste dag van die jaar 2025 en ons is hier om dit te beleef! Is dit nie ‘n wonderwerk nie? Dit is beslis, maar net soos met baie ander wonderwerke is dit so maklik om die wonder daarvan nie te besef nie. Mens aanvaar dit as vanselfsprekend. Net soos die son wat elke dag weer opkom, of soos die suurstof wat ons inneem en die asem wat ons aan die lewe hou, wat ons oor die algemeen nie in ag neem nie. Ons verwag dit en dus dink ons nie veel daarvan nie.

So ook met die loop van die jare, die draai van dag na dag, die geleentheid om weer op te kan staan en ‘n nuwe dag aan te pak. Ons waardeer dit nie.

Tog is ons werklik bevoorreg.

Wat help voorreg egter as mens dit nie besef nie? Voorreg raak ‘n verlies wanneer mens dit nie waardeer nie. Dit was waar die leemte in die lewe ontkiem - die miskenning van voorreg lei direk na ‘n gebrek aan waardering, 'n ongesonde aanspraak, 'n ontnugtering met die lewe, 'n afgematte benadering tot alles wat werklike waarde het en 'n misleide gejaag na oppervlakkige bykomstighede.

Dit wat jy het, is tydelik en sonder sekerheid. Vandag sit jy op die troon, môre sit jy sonder blyplek. So smaak die lewe. Waardeer egter die geleentheid wat jy weereens vandag kry om te lewe.

Lewe opreg en werklik, nie op sosiale media en in die oë van jou volgelinge nie, maar in jou hart en daar waar jy is. Die nuwe jaar bied die geleentheid om weereens jou bestaan te waardeer, te evalueer, en om te sien dat jy self ook ‘n wonderwerk is. Jy is ‘n wonder tussen wonders.

Dit is rede vir viering, blydskap en dankbaarheid.

My oom het altyd gesê: Laat dit juig en vrolik wees!

Vandag is rede genoeg.

Dinge verander. Hierdie werklikheid is tydelik. Of dit nou goed is of sleg, dit sal nie vir altyd so bly nie. Hier lê die hart van hoop, maar ook van vrees. Ons raak bang dat ons dit sal verloor wat ons het. Hierdie vrees is onnodig. Daar is geen kwessie of ons die huidige kan behou nie. Dit sal ook heengaan. Tog kan ons die herinneringe koester, mits ons genoeg aandag skenk om hulle te onthou.

Gee aandag waar jy is. Waardeer wat jy het. Haal diep asem en wees dankbaar, en dan moet jy dit laat gaan om plek te los vir wat nog kom.

Soos 2025 afskop, kan jy verseker wees dat daar nog baie kom.

Maak die beste daarvan.

Wees die lig in die tonnel wat jy nodig het. Wees jou eie held. Word daai groot boom wat vir ander ook skadu en skuiling kan bied.

Ek wens ons almal ‘n voorspoedige jaar toe.

God seën vir julle, God spaar vir julle en mag God ook ons land in Sy hand hou, dat ons vir Afrika ‘n voorbeeld kan bied, dat mense vir mekaar kan omgee en dat die lewe werklik ‘n gawe is.

Dankie vir die toekoms.