Vind genesing buite die stad se gedruis

Oor die jare het ons al hoe meer ons verbintenis met die natuur prysgegee. Die gejaag van die stadslewe, die oorstimulasie van tegnologie en die voortdurende druk om meer te doen, laat min tyd oor vir rus en introspeksie.Tóg is daar ’n diep genesende krag in die natuur – ’n genesing wat jy kan aanvoel wanneer jy omring is deur die Namibiese bosveld of wanneer die aardse reuk van reën jou oorrompel. Die natuur het ’n manier om die siel te kalmeer.Dit is opvallend hoe die natuur stres en angs kan verlig. Navorsing toon dat wanneer ons tyd in die natuur deurbring, ons kortisolvlakke – die liggaam se primêre streshormoon – aansienlik daal. Die stilte van die bosveld, die vars lug, die gevoel van oneindige ruimte en vryheid – dit alles het ’n kalmerende effek wat moeilik in die stad gevind kan word. Elke oggend, wanneer die sonsopkoms oor die bosveld breek en voëls begin lawaai, is dit ’n herinnering dat ons ’n integrale deel van die aarde is. Boonop is daar ook die kreatiewe en kognitiewe voordele van die natuur. Wanneer ons in die buitelug is kry ons brein ’n blaaskans van die intense fokus wat ons daagliks moet toepas en dit gee ons kreatiwiteit ’n hupstoot. Die natuur bied ons ’n kans om ons koppe skoon te maak en weer helder te dink. Die stad, met sy konstante geluide, ligte en gewoel, kan jou oorlaai en jou gedagtes besoedel, terwyl die natuur jou gedagtes stilmaak.Wanneer jy weer die geleentheid kry om op ’n plaas te kuier, langs die strand te ontspan of selfs te gaan kamp, oorweeg sommer ook om jou selfoon eenkant toe te skuif. Namate ons al hoe meer afhanklik raak van tegnologie, raak dit al moeiliker om jouself van die besige wêreld los te maak en die natuur werklik te waardeer. Met jou selfoon afgeskakel, kan jy ook jou gedagtes afskakel en uiteindelik rus. Hierdie gevoel van vryheid en die vermoë om net teenwoordig te wees is iets wat mense in die stad dikwels mis. Wanneer ons die tyd neem om buite in die natuur te wees, ervaar ons ’n soort vrede wat moeilik in ons moderne, digitale wêreld gevind kan word.Jy hoef nie noodwendig ver te ry om hierdie rustigheid te ervaar nie. In Afrika is ons geseënd om omring te wees deur natuurskoon. Dit hoef ook nie ’n groot gedoente te wees nie, ’n vinnige staptog by Avisdam of ’n dagbesoek na Midgard of Daan Viljoen, behoort ook die doel te dien.Die eenvoudigste oomblikke, soos om op die agterkant van ’n bakkie te staan met die wind deur jou hare waai, laat jou voel asof jy deel is van iets groters. Die impak van hierdie ervarings – klein of groot, lank of kort – word dikwels misgekyk of onderwaardeer. Dit is wetenskaplik bewys dat hierdie ervarings noodsaaklik is vir ons gesondheid en welstand.Studies oor biofilie – die mens se ingebore liefde vir die natuur – toon dat ons fisiologies en geestelik voordeel trek uit ons kontak met die natuur. Terapievorme soos ekoterapie word al hoe gewilder namate mense die genesende impak van die natuur begin besef.Klein oomblikke van rus en introspeksie in die natuur kan ’n enorme impak op jou geestesgesondheid hê. Al is dit net ’n vinnge stappie met die honde of om die tuin nat te lei.Om in die natuur te wees moet nie as ’n luuksheid beskou word nie, maar eerder as ’n noodsaaklike komponent van geestelike en emosionele welstand. Dit is iets waarvoor ons tyd moet maak.Buiten vir die noodsaaklikheid van tyd in die natuur, is dit ook ’n eenvoudige oplossings vir matige angs en depressie en boonop is dit gratis en maklik bekombaar. Probeer eers jou voet by die deur uitsit voor jy jou hand in ’n pilbotteltjie druk. In die stilte van die bosveld en die varsheid van die oggend, lê ’n diep genesende krag. – kristien@nmh-hub.com.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Vind genesing buite die stad se gedruis

Kommentaar

Republikein 2025-01-08

Meld asseblief aan om kommentaar te lewer

Vind genesing buite die stad se gedruis

Kommentaar

Republikein 2025-01-08

Meld asseblief aan om kommentaar te lewer

MELD AAN

Advertensie