Voortsnel gedagtig aan niks

Hans Strydom – Elke donker wolk het ’n silwer randjie, maar dit is ook so dat elke silwer randjie ’n donker wolk het. Die afgelope paar dae het ek weer eens gesien dat reën net in mense se tuine en op plase ’n goeie ding is. Die water werk egter nie so lekker saam met die motorryers van Windhoek nie en ’n mens kry soms die indruk dat dit nie water is wat uit die wolke val nie, maar wel suiwer alkohol.Ek staan Dinsdagoggend ná ’n ligte bui reën op die hoek van Sam Nujomarylaan en Mandume Ndemufayostraat, toevallig by ’n motorongelukstoneel. In minder as tien minute was daar byna nog tien ander ongelukke met motors wat aanhoudend met slepende remme tot in die middel van die kruising gly, terwyl ander motorbestuurders verwilderd rondkyk of hulle nie dalk die volgende slagoffer van ’n klomp metaal teen ’n hoë snelheid gaan wees nie. Selfs verkeersbeamptes kon maar net kopskuddend toekyk terwyl die toneel homself afspeel. As ’n motorryer nie eens by ’n rooi verkeerslig stilhou nie, wat sal dan met ’n verkeersbeampte gebeur as hy ’n poging aanwend om die motor voor te keer? Dit lyk soms of Windhoek se motorryers probeer om alle moontlike spoed uit hul motors te kry as dit die dag reën. Dinsdagnag, tydens ’n reënbui, het ek gesien hoe motors teen hoë snelhede deur die strate jaag op ’n wyse wat selfs vir Llewellyn Anthony in koue sweet sal laat uitbars. ’n Reënbui is egter nie die enigste probleem van motorbestuurders in die stad nie. Daar is ook diegene wat blykbaar hul motors op dagga laat loop en die uitlaatgasse in die kajuit loslaat. Dié mense ry gewoonlik heen en weer oor die bane, steur hulle nie aan padtekens nie en hou stil net waar hulle wil. Moet ook nie waag om vir dié motorryers toeter te druk nie. Hulle spring sommer maklik met ’n wilde uitdrukking in die oë uit die motor met ’n mes, vuurwapen of ander gevaarlike voorwerp en probeer die saak op dié wyse oplos. Daar is ook die groep motorbestuurders wat hulle glad nie aan verkeerstekens steur nie. Hulle laat die strepe op die pad en die verkeerstekens na ’n werkverskaffingsprojek van die munisipaliteit lyk wat gemaak is om geen doel te dien nie. Ek wil nou nie hiermee sê dat ek die beste bestuurder in die stad is nie. Ek self ry dalk soms of ek reënwatergedrink het of die uitlaatpyp in die kajuit het. Miskien is dit nou hoogtyd dat ons saamstaan en probeer om ons motors te bestuur soos dié bestuurders van Windhoek wat daarop kan roem dat hulle nie spoedoortredings begaan of ongelukke veroorsaak nie. Ry dus stadiger as dit reën, dink aan die pyn en onkoste as daar ’n ongeluk is en hou die ander motorryers in gedagte. Dit sal jou aan die einde van die dag baie geld spaar en ook die onnodige kritiek teen die verkeersafdeling minder maak. – 16 Februarie 1995

Voortsnel gedagtig aan niks

Kommentaar

Republikein 2025-04-02

Meld asseblief aan om kommentaar te lewer

Voortsnel gedagtig aan niks

Kommentaar

Republikein 2025-04-02

Meld asseblief aan om kommentaar te lewer

MELD AAN

Advertensie