Chinese het groen energieplanne vir Walvis

Die Chinese miljardêr Zhang Lei was verlede maand in Windhoek om senior regeringsamptenare te ontmoet om planne te bespreek om ’n megagroen-ammoniakprojek aan die kus op te rig.

Zhang, wat met president Nangolo Mbumba en verskeie kabinetsministers en amptenare van die groenwaterstofprogram vergader het, het Namibië besoek om sy aandeelhouding in die Zhero 500 000-ton groen ammoniakprojek buite Walvisbaai te bevorder, het James Mnyupe, die groenwaterstofkommissaris, gesê.

Zhang se maatskappy Envision, ’n voorloper in slim windturbine-opwekkers en die grootste verskaffer van windturbines in die wêreld en ook die wêreld se voorste hernubare en digitale energie-entiteit, het in September by die Afrika-waterstofberaad aangekondig dat hy met Zhero ooreengekom het om in die projek te belê.

Mnyupe en Theopolina Kapani, die tegniese hoof van konstruksie by die groenwaterstofprogram, het pas teruggekeer van ’n warrelwindbesoek aan Europa en Asië, waar hulle veral beïndruk was met Envision se nuwe netto-nul-nywerheidspark in Mongolië. Daar word hernubare energie op ’n reuseskaal ingespan om batterytegnologie te vervaardig.

Volgens Mnyupe wil Zhang tien soortgelyke parke oraloor die wêreld bou, met Namibië wat geïdentifiseer word as die toegangspunt vir sy wêreldwye onderneming in Afrika suid van die Sahara.

Hy het na Zhang verwys as die “Elon Musk van China” en verduidelik dat die entrepreneur ook gelok word deur Namibië se litium, wat saam met son- en windkrag, groen waterstof en ammoniak ’n sleutelbestanddeel is vir die omgewingsvriendelike batterye wat hy beoog om plaaslik te vervaardig.

Envision se EnOS-rekenaarstelsel sal die koolstofvoetspoor van die batterye naspoor om sertifisering vir uitvoer na elke wêrelddeel te vergemaklik, brei Mnyupe uit.

“Ons het nog nooit ’n onderneming soos hierdie gesien nie,” het hy gesê.

“Hulle gebruik hul eie toerusting, hul eie tegnologie en hul eie energie as ingenieurs, aankopers en bouers, oorspronklike vervaardigers en eienaars ook. China beplan wêreldwye oorheersing deur die produksie van groen goedere,” voeg Mnyupe by.

Die toer het besoeke in Hamburg en Stuttgart in Duitsland, China, Tokio en in Londen ingesluit. Vroeër hierdie maand, by die wêreldwye maritieme forum se jaarlikse beraad in Tokio, en voor dit by die week van internasionale skeepvaart in Londen, was die klem op “skoon” skeepvaart, volgens Kapani.

Sy het die Belgiese CMB-Tech-vennootskap met die Ohlthaver & List-groep uitgesonder, wat deur Cleanergy se ammoniakstoorgeriewe op Walvisbaai met groenwaterstofproduksie op Arandis wil verbind om skepe by die hawe te hervul en energiemolekules te laai wat vir die wêreldmarkte bestem is.

“Ons wil Walvisbaai as ’n skoon energie-spilpunt vestig,” het sy gesê.

Geriewe om skepe te hervul, verbeterde hawe-infrastruktuur en terminale moet gebou word om die hawe ’n bestemming op groen skeepvaartkorridors te maak, en hiervoor beplan die groenwaterstofprogram om nou saam te werk met die maritieme direktoraat om ’n aksieplan te ontwikkel vir die vermindering van koolstofvrystellings by die hawe, het sy verduidelik.

Vandeesweek is ’n reeks belanghebbendevergaderings deur die groenwaterstofprogram gereël, waar inligting gedeel is oor twee voor-uitvoerbaarheidstudies vir meer waterstof- en ammoniakproduksie-aanlegte, en aflandige windkragopwekking, in die verre suide van die land.

Hierdie studies behoort teen Maart volgende jaar voltooi te wees om rigting te gee aan verdere ontwikkelings, voeg sy by. – [email protected]