Drikus en Melissa baas in bergpas se klim

Ná die gewildheid en sukses van se eerste weergawe, is die voorspelling dat die Imu-b Kupferbergpas-solotydtoets wat by uitstek as ’n toets vir bergfietsryers se klimvermoë teen steiltes op dien, in die toekoms net méér gaan groei.Drikus Coetzee en Melissa Hinz het Saterdagoggend die elite-afdelings oor 11.4 kilometer teen die berugte Mambaroete gewen. Coetzee het die strawwe klim in 28 minute 56.78 sekondes voltooi. Hinz met 40:16.58 is die koningin van die berge.Roger Suren het die junior mansafdeling gewen (32:37.70), Kai Pritzen was die eerste subveteraan (31:58.91) en Belinda van Rhyn die subveteraan vrouewenner (45:27.64). Deopharma het die byeenkoms met die tegniese steun van Mannie’s Bike Mecca aangebied, wat 07:00 onderaan die bergpas by die plaas Klein Aub weggespring en bo-op die plato geëindig het.Drie nasionale senior elite manskampioene het vir die uitdaging aangetree, wat die kompetisie uiters straf gemaak het. Alex Miller is die Namibiese bergfietskampioen en Olimpiese verteenwoordiger van 2020, Coetzee die heersende nasionale padfietskampioen en Jean-Paul Burger die Namibiese individuele tydtoetskampioen op die padfiets.Miller was tweede beste, met Burger derde. Burger was onlangs in Kaapstad met die ikoniese Kaapstad-fietstoer die eerste Namibiër oor die eindstreep met ’n puik vyfde posisie, met Coetzee kort op sy agterwiel (sewende).Herman Maritz, stigter en hoofbeampte van Deopharma, het aan die koerant gesê: “Deopharma is 100 persent ’n Namibiese maatskappy en ons ploeg graag terug in ons mense en atlete. Dit was ons eerste byeenkoms en die Kupferbergpas is die mees uitdagende gedeelte wat ons kon vind. Daarom het ons dit gekies.“Ons leuse is Elevate Life en die idee is om dié byeenkomste aan te bied om die ryers ná inperkings in die buitelug te kry. Dit sal ’n jaarlikse byeenkoms word om te kyk wie die pas die vinnigste kan uitklim om as die Koning en Koningin van die Berg bekroon te word.“Vir die skole het ons ’n wisseltrofee wat vanjaar na Windhoek Gimnasium gegaan het. Drikus en Melissa het ook elkeen ’n wisseltrofee ontvang.“Ons het wel met min ryers begin, maar die byeenkoms kan beslis groei namate die belangstelling verbeter. Almal het goeie komplimente gehad oor die organisasie en geskenksakkies wat hulle ontvang het. “Ons beplan om elke kwartaal ’n ander sprint-kompetisie te hou, asook ’n maanligresies, asook vir padwedloopatlete ’n straatmyl wat tevore baie gewild was. Ons wil graag in elke groot dorp ’n straatmyl aanbied wat die hele gesin betrek. “Ons bedank al die borge wat die gelukstrekking en geskenksakkies geborg het. Baie dankie aand die O&L-groep, Namibia Dairies, Hartlief, AquaSplash, Namibië Brouery, Oshikandela, Spar Elisenheim, Execuspecs, BRG Biokinetics, Langerhans Pharmacy, Mannie’s Bike Mecca en All Jack Fitness Elisenheim wie die byeenkoms ’n sukses gemaak het.”&bull; Die voorste uitslae:Elite mans (17 tot 29 jaar): 1 Drikus Coetzee (28:56.78), 2 Alex Miller (29:00.35), 3 JP Burger (29:01.69). Elite vroue: 1 Melissa Hinz (40:16.58), 2 Marion Schonecke (43:44.25). Junior mans (o.17): 1 Roger Surén (32:37), 2 Adrian Key (33:40), 3 Marco Thiel (36:01). Subveteraanmans (30 tot 39): 1 Pritzen (31:58), 2 Xavier Papo (33:52), 3 Petrus Human (36:43). Subveteraanvroue: 1 Belinda van Rhyn (45:27). Veteraanmans (40 to 49): 1 Michiel Greeff (37:02), 2 Theo Klein (38:09), 3 Roland Neuburg (38:25). Veteraanvroue: 1 Sandra Lippert (44:31). Meestermans (50 tot 59): 1 Sarel Boshoff (40:14). Grootmeestermans (60 en ouer): 1 Gerhard Mans senior (38:16), 2 Renier Taljaard (57:39). GRAVEL & DIRT SUNDOWNERDie tweede bergfietsbyeenkoms in die reeks is Woensdagaand oor 24 kilometer by Heja Lodge afgehandel.Die vroue-afdeling is deur Anri Krugel in 49 minute 01 sekonde gewen, met Monique du Plessis tweede in 51:58. Anneke Steenkamp (53:16) was derde.Krugel het ook die eerste byeenkoms op 9 Maart by dieselfde venue en afstand gewen (48:04). Irene Steyn en Ada Kahl was toe onderskeidelik tweede (51:51) en derde (53:56). Drikus Coetzee het verlede week die mansresies in 41:23 opgeraap, met Jean-Paul Burger (42:38) tweede en Hardus Nel derde in 44:43.Coetzee was met die eerste byeenkoms ook baas (40:13), met Ingram Cuff tweede (40:14) en Philip Steyn derde (44:46).Altesame 41 vroue en 92 mans het aan die tweede tydtoets deelgeneem.Die volgende datums vir die Gravel & Dirt Sundowner-reeks by Heja Lodge is 6 en 20 April, 11 Mei asook 6 en 20 Julie. Die laaste byeenkoms vind op 3 Augustus plaas. Meer inligting is by www.raceday.events.com beskikbaar. – tielman@republikein.com.na

Drikus en Melissa baas in bergpas se klim

Kommentaar

Republikein 2024-11-22

Meld asseblief aan om kommentaar te lewer

Drikus en Melissa baas in bergpas se klim

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie