Griep ontwrig Tsumeb se skoolwerk én rugby

Uit die 107 skoliere van Tsumeb Gimnasium se hoërskoolklasse het 49 vandeesweek tuis aangesterk met griepsimptome, wat 45% van die skool verteenwoordig.Hierdie stand van sake is op die voorgrond gedryf toe die skool se eerste rugbyspan gevolglik noodgedwonge aan komende Saterdag se Standard Bank onder 19 premierliga-wedstryd moes onttrek, wat by die WHS Vegkop-stadion sou plaasvind.“Ons beleef dat veeltalle skoolkinders griepsimptome ondervind, van wie verskeie in die hospitaal opgeneem is. Virale Influenza B-infeksies is by sommige bevestig,” skryf dr. PD du Plessis van Etosha Medicare in ’n skriftelike nota wat die skool tydens sy onttrekking aan die rugbywedstryd aangeheg het.Du Plessis voeg by: “Hierdie toestand neem tien dae om op te klaar en in my professionele siening behoort die betrokkenes nie aan sport deel te neem terwyl hulle griep het nie. Ek stem heelhartig saam met die Internasionale Olimpiese Komitee se konsensus van 2022 dat enige siekte wat in die boonste lugweë voorkom, as lig of matig of ernstig geklassifiseer behoort te word. In die meeste gevalle wat by dokters aangemeld is, is die siekte op ’n matige vlak.”“Hierdie sportdeelnemers behoort eers tot sport terug te keer sodra al die sistemiese simptome opgeklaar het, wat volgens studies ’n tydperk van sewe dae beteken. My professionele mening is dat dit minstens tien dae sal duur vir die deelnemers om terug by oefensessies te wees en dat hulle dan teen ’n oefenpas van 60 persent van hul gebruiklike inspanning kan oefen voordat hulle weer wedstryde speel.”Compack Tsumeb Gimnasium se eerste span is tans in die vierde posisie uit die agt spanne in die Standard Bank onder 19-premierliga.Wouter Niehaus, skoolhoof en afrigter van die eerste span, het die betrokke partye en organiseerders Dinsdag skriftelik van Tsumeb Gim se onttrekking ingelig.“Dis die eerste keer in ons skool se rugbygeskiedenis dat ons uit ’n premierliga-wedstryd moet onttrek. Oor die laaste weke het ons ’n beduidende voorkoms van griep by ons skoliere beleef en verskeie is in die hospitaal opgeneem.“Hoewel ons in ons vorige twee (verloor)wedstryde teen Moria en Pro-Ed sonder onderskeidelik vier en ses spelers klaargekom het, het die situasie vandeesweek beduidend versleg.“Uit ons o.19-groep is 13 spelers tans afgeboek, van wie 11 in die beginspan is. Dit laat ons met net nege spelers. Sonder ’n volledige span het ons geen keuse as om aan hierdie wedstryd te onttrek nie. Ons vra verskoning vir enige ongerief en ontwrigting aan u beplanning en waardeer u begrip.”Die onoorwonne Samsung WHS sou komende naweek Tsumeb Gim (36 punte ná twee oorwinnings uit ses wedstryde) se laaste ligawedstryd voor die semifinale gewees het. Tsumeb se vierde posisie en kwalifisering vir die uitklopfase word veral deur OK Moria van Outjo en Autohaus Windhoek Affies bedreig (Besonderhede van die liga by www.rugby.my.na).

Griep ontwrig Tsumeb se skoolwerk én rugby

Kommentaar

Republikein 2025-04-15

Meld asseblief aan om kommentaar te lewer

Griep ontwrig Tsumeb se skoolwerk én rugby

Kommentaar

Republikein 2025-04-15

Meld asseblief aan om kommentaar te lewer

MELD AAN

Advertensie