Inisiatief plaas soeklig op vrouerenjaers

Met die oog daarop om die eerste vroue- Formule 1 (F1)-wêreldkampioen na dié reeks te bring, het die More Than Equal-inisiatief die eerste ses meisies by sy renjaerontwikkelingsprogram verwelkom.More Than Equal is gestig deur David Coulthard, ’n voormalige F1-renjaer sowel as die wenner van 13 F1 Grand Prix-wedrenne in die 14 jaar wat hy aktief by F1 betrokke was, in samewerking met die sakeman Karel Komárek.“Hierdie groep talentvolle jong renjaers sal nou deel wees van ’n program wat ontwerp is met hul ouderdom en geslag in gedagte, met gespesialiseerde afrigters wat hul reis sal ondersteun om hul volle potensiaal te bereik,” het Coulthard gesê met die bekendstelling van die renjaerontwikkelingsprogram.Alhoewel dit in motorsportkringe aanvaar word dat meisies en vroue in dieselfde kategorieë teen mans moet kan meeding, is daar steeds ’n gaping in die deelname van die geslagte aan motorsport.In hul poging om die eerste vroue-F1-kampioen te bemagtig, het More Than Equal navorsing gedoen oor die verskeie uitdagings wat vroue in motorsport in die gesig staar.Hierdie navorsing werp ’n lig op verskeie onderwerpe, insluitend stereotipering, kultuur en verandering sowel as die wêreldwye deelname en uitslae van vroue en meisies in motorsport.Hul bevindinge is in ’n verslag getiteld “Inside Track: Exploring the gender gap in motorsport” gepubliseer.DEELNAME EN UITSLAEDie navorsing dui op twee maniere waarop meisies en vroue ’n agterstand het teenoor mans en seuns in die sport. Daar is ’n gaping in deelname en uitslae tussen mans en vroue. Ongeveer 10% van mededingers in motorsport is vroue – wanneer dit in kategorieë gedeel word, is 13% van mededingers in renstel-kategorieë meisies, met 7% van deelnemers aan GT-renne en formulerenne wat vroue is.Die vroue wat aan renstel-renne deelneem, verteenwoordig 40% van vroue se deelname aan motorsport.Selfs met die ongelyke deelnamekoerse vaar vroue ook nie so goed soos mans wat hul uitslae betref nie, met vroue wat tans 4% van die topkampioenskap se ranglys uitmaak. Dié ranglys word gemeet as die top-5%.In ’n wêreld waar vroue die helfte van die F1-renjaers uitmaak, moet vroue se deelname aan renstel-renne groei tot 84% van alle deelnemers aan motorsport teen die huidige pas van hul deelname en vordering deur die verskillende vlakke van motorsport, volgens More Than Equal se verslag.“Hierdie is waarskynlik as gevolg van die feit dat vrouetalent verskeie struikelblokke in die gesig staar namate hulle in dié sport vorder, bo en behalwe dié wat seuns en mans ervaar – alhoewel vooruitgang in motorsport sonder twyfel vir almal moeilik is,” sê die verslag. Die verslag noem ook ’n gebrek aan vrouerolmodelle en navorsing oor moontlike “meganiese uitdagings”, soos die moontlikheid dat die ontwerp van sekere toerusting vroue kan benadeel as van die moontlike struikelblokke vir vroue in die sport.STEREOTIPERINGTradisionele wanindrukke van vrouerenjaers wat gereeld in motorsportkringe voorkom, sluit in dat hulle nie fisiek sterk genoeg is om saam met mans mee te ding nie; hulle nie die emosionele vermoë het om die druk te hanteer nie; en hulle minder geneig is om waaghalsige besluite te neem wat nodig is om suksesvol in motorsport te wees, volgens die verslag.More Than Equal het egter gevind dat die meerderheid mense nie hierdie siening deel nie. Daar is ook tans geen wetenskaplike bewyse dat enige daarvan waar is nie.More Than Equal het egter in hul persoonlike onderhoude met mense na aan motorsport gevind dat te min tyd op die renbaan, en minder toegang tot tegniese en taktiese opleiding spesifiek vir vroue vroeg in hul loopbane, vroue se deelname aan die elite-klas van motorsport belemmer.“Ons het die wetenskap, ons weet hoe om renjaers in staat te stel om uit te blink, of hulle nou mans of vroue is,” het ’n voormalige F1-renjaer in sy onderhoud met More Than Equal gesê.In die opname is gevind dat slegs 50% van die respondente geweet het dat vroue saam met mans in F1 kan deelneem, ondanks die feit dat 82,3% van die respondente gesê het dat hulle ywerige aanhangers van die sport is. Ander soorte motorsport het ook dieselfde gebrek aan kennis oor die deelname van vroue getoon.Die meeste aanhangers stem saam dat vroue nie in aparte kategorieë moet deelneem nie, maar dat dit vir meer opwinding sal sorg as vroue saam met mans meeding.Vroue wat op die opname gereageer het, het ook aangedui dat hulle meer in motorsport sou belangstel as meer vroue sou deelneem – 45% van vrouerespondente het gesê hulle sal dan meer rede hê om motorsport te volg.Daar is ook ’n mate van optimisme oor die moontlikheid van vroue in F1 met 80% van F1-aanhangers wat aan die opname deelgeneem het wat sê hulle glo dat daar binne die volgende 10 jaar ’n vrouerenjaer aan F1 sal deelneem.Volgens 50% van dié groep sal ’n vrou binne dieselfde tydperk ook ’n F1-wedren gewen het.Die Suid-Afrikaanse renjaer Desiré Wilson is die enigste vrou wat nog ooit eerste oor die wenstreep van ’n F1-wedren gery het, maar het nie vir die kampioenskap gekwalifiseer nie. ’n Pawiljoen is steeds na haar vernoem by die Brands Hatch-renbaan in die Verenigde Koninkryk, waar sy hierdie geskiedkundige oorwinning behaal het.KULTUUR EN VERANDERINGIn hul onderhoude met More Than Equal het vrouerenjaers voorbeelde gegee van hoe hulle ongemaklik gevoel het in motorsportkringe of nie toegang tot gepaste fasiliteite by byeenkomste waar hulle meegeding het, gehad het nie.Sommige het aangevoer dat daar verbetering was, maar ander voel steeds dat seksisme en onvanpaste kommentaar baie van hul ervarings in die motorsportgemeenskap oorheers.– irene@republikein.com.na

Inisiatief plaas soeklig op vrouerenjaers

Kommentaar

Republikein 2024-11-22

Meld asseblief aan om kommentaar te lewer

Inisiatief plaas soeklig op vrouerenjaers

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie