Nieu-Seeland kies span vir Kampioenebeker-toernooi

Ben Sears, Nathan Smith en Will O’Rourke sal in Februarie vir die eerste keer vir Nieu-Seeland in ’n globale toernooi speel. Dié drie naatboulers is ingesluit in die Kiwi’s se span vir die Kampioenebeker-toernooi, wat in Pakistan en die Verenigde Arabiese Emirate gehou gaan word.

Met die ervare Trent Boult en Tim Southee wat nie meer vir internasionale diens beskikbaar is nie, sal Matt Henry Nieu-Seeland se snelaanval lei.

Die vyfde snelbouler in die span is Lockie Ferguson.



Sears was vir ’n groot deel van verlede jaar weens ’n kniebesering buite aksie.



O’Rourke en Smith het op hul beurt onlangs goeie spel vir die Black Caps teen Engeland en Sri Lanka gelewer.



Die draaibouler Mitchell Santner sal die span aanvoer. Hy, Kane Williamson en Tom Blundell is die enigste spelers in die groep wat in 2017 by die vorige Kampioenebeker-toernooi in aksie was.



Die Black Caps sal voor die toernooi begin in Karatsji opwarmingswedstryde teen Pakistan, Suid-Afrika en Afganistan speel.



Span: Mitchell Santner (k), Michael Bracewell, Mark Chapman, Devon Conway, Lockie Ferguson, Matt Henry, Tom Latham, Daryl Mitchell, Will O’Rourke, Glenn Phillips, Rachin Ravindra, Ben Sears, Nathan Smith, Kane Williamson, Will Young. – Netwerk24/Reuters