Pakistan rasend oor Wiese se sesse

David Wiese se spesialisrol om aan die einde van ’n T20-kolfbeurt vuurwerke te verskaf, is Sondagaand opnuut uitstekend uitgevoer toe hy die Lahore Qalandars gehelp het om vir die eerste keer as die kampioenspan van die Pakistan Superliga bekroon te word. Die 36-jarige Namibiër het net agt balle aan die einde van die Qalandars se kolfbeurt ontvang, waarvan hy drie sesse en ’n vier geslaan het om op 28 nie uit nie te eindig. Saam met sy 23-jarige Engelse kolfvennoot Harry Brook (41* van 22 balle) het ’n briljante vennootskap van 43 lopies in net 2.4 boulbeurte die ganse momentum van die aksiebelaaide eindstryd in ’n stampvol Gaddafi-stadion in Lahore geswaai – nadat hul opponente die Multan Sultans tot in daardie stadium die druk toegepas het. Die tienduisende Asiatiese krieketaanhangers wat op sosiale media hul opgewondenheid en bewondering oor Wiese se puik spel laat blyk het, spreek opnuut van die reusegewildheid en respek wat hy in veral Pakistan en Indië geniet. Die Qalandars het Sondag hul twintig boulbeurte op 180/5 afgesluit, gebou rondom die Pakistanse kolwer Mohammad Hafeez se 69 lopies van 46 balle, voordat hulle die Multan Sultans vir 138 uitgeboul het. Wiese het ook die finale paaltjie geneem (1/16 in 1.3) toe hy die voormalige Proteas-bouler Imran Tahir vir 10 laat uitvang het – wat vir die hele groep niespelende lede en spanbestuur die teken was om juigend kolfblad toe te storm en Wiese en sy jong kaptein Shaheen Afridi te omhels.

HELD VAN SEMIFINAAL Twee aande tevore was Wiese se veelsydige ingrypings as die bekroonde speler van die wedstryd ewe deurslaggewend om die uitklopwedstryd teen Islamabad United in die liggroenes se guns te beklink en die Qalandars tot hul eerste PSL-eindstryd te laat deurdring. Vreemd genoeg was sy kolfsyfers presies identies soos in Sondagaand se eindstryd – 28 nie uit nie van 8 balle, drie sesse, een vier. Hiervan het hy 26 lopies in die laaste boulbeurt gemoker, wat ook met ’n wydloper begin het (27). Later die aand het die spanning boonop hoog geloop toe Wiese as bouler in die 20ste boulbeurt agt lopies moes verdedig. Hy het eers twee leë balle afgestuur voordat Mohammad Wasim in die poging vir ’n tweede lopie uitgehardloop is. Wiese het hierna die doodskoot toegedien toe nommer elf Waqas Maqsood die bal in die lug geslaan het en uitgevang is. Die Qalandars het met ses lopies gewen.

GELUK AAN MY KANT Die Namibiër het ná die finaal gesê die feit dat die Qalandars die enigste span was wat ’n ligawedstryd teen die Sultans kon wen, het hulle selfvertroue gegee. “Dit was een van daardie wedstryde waar die momentum gedurig heen en weer geswaai het,” het Wiese aan Cricinfo gesê. “Dit was die hele tyd op en af. Ons het ’n paar vroeë paaltjies verloor, maar het goed herstel. Dit was net een van daardie ongelooflike T20-wedstryde wat ek dink almal op die punt van hul stoele gehou het tot die laaste bal. "Ek het soort van geweet ons nie genoeg in die eerste beurt aangeteken nie en dat 150 nie juis ’n wentelling sou wees nie. So, ek het geweet ons moet ’n paar groot boulbeurte aan die einde hê om onsself in ’n posisie te plaas om dit te verdedig. “Jy weet, die geluk was nie deurgaans aan my kant in dié toernooi nie, maar gisteraand was daar een of twee balle wat ek gelukkig genoeg was om te benut. “Die eerste een (ses in die laaste boulbeurt) was ’n goeie een, want dit het die skare agter my gekry en die atmosfeer opgelaai het. Ek dink dit het in daardie stadium ’n bietjie meer druk op die bouler geplaas. Dis nogal intimiderend as almal vir die kolwer begin juig en jy voel almal daar is teen jou. “Soos ek gesê het, een of twee balle was daar om geslaan te word en ek kon daaruit munt slaan.” Wiese het nie hierdie PSL-seisoen ’n oorvloed lopies aangeteken nie (140 lopies in 12 wedstryde), maar dit het nie krake in sy selfvertroue meegebring nie. “Om eerlik te wees, ek het nie aan myself getwyfel nie,” het hy gesê. “Dit was dalk nie ’n goeie PSL-seisoen vir my nie, om groot kolftellings op die telbord te plaas nie, maar ek het steeds gevoel ’n groot telling is net om die draai en nou het ek net nie heeltemal daardie geleentheid gehad nie. “Soms het die boulers hul vaardighede met uitstekende akkuraatheid uitgevoer, veral met streepballe in die laaste paar wedstryde wat my geen ruimte gegee het vir houe om lopies aan te teken nie. “Dis nie asof ek gedink het ek is van stryk af nie. Dit het net nie gewerk nie. Soms werk dinge nie uit as jy teen die einde groot houe moet gaan slaan, of as bouler ’n telling moet verdedig nie. Jy moet net geduldig bly en die geloof behou dat jy die harde werk op die oefenveld insit en dat jy jou vaardighede en vermoëns moet vertrou. Gelukkig vir my het dit in die groot wedstryd vrugte afgewerp.” – Bygewerk van Cricinfo