Punte vir land die topspelers se strewe

Op die laaste van die drie speeldae bereik die Namibiese Muurbalvereniging en Visions Consulting se drienasietoernooi by die Wanderers-bane vandag sy hoogtepunt, met Suid-Afrika wat sy voorsprong in beide die mans- en vrouekompetisies verdedig.

Met bykans volsterkte spanne keil Suid-Afrika, Zambië en Namibië mekaar goed op, met ’n Namibiese Barbarianspan wat in die manskompetisie byeen gebring is as plaasvervanger nadat Zimbabwe as die vierde nasie onttrek het.

Moegheid in die bene en om konsentrasie te behou op dag drie van ’n taai toernooi, boonop ná afloop van laas week se ewe kompeterende BDO Namibiese Ope kampioenskap, is presies die soort uitdaging wat die organiseerders van die Namibiese Muurbalvereniging in gedagte gehad het om die vlak van die plaaslike spel te stimuleer.

In gister se kragmeting tussen die Namibiese en Zambiese vroue was van die uitslae soos volg: Christine Mwachambo klop Lida-Marie Calitz drie stelle teen twee; Beatrice Namfukwe onttrek met ’n besering teen Helena Coetzee; Abigail Chanda klop Chantel de Gouveia met 3-0; Diana Musa klop Adri Lambert met 3-0.

Vandag se bepalings:

Suid-Afrika tn Zambië (vroue), Visions-baan, 11:00.

Suid-Afrika tn Namibië Barbarians (mans), Sanlam-baan, 15:00.

Namibië tn Zambië (mans), Visions-baan, 15:00.

Suid-Afrika tn Namibië (vroue), BDO-baan, 15:00.