Saood volg in sy pa en oupa se voetspore

Werner Wippenaar - Die Johannesburger Saood Variawa het soos baie renjaers sy motorsportloopbaan begin met renstelle, maar hy is nou op 19-jarige ouderdom reeds ’n Dakar-rekordhouer.Dié Toyota Gazoo Racing-jaer het verlede week die Dakar-rekordboeke herskryf. Hy het die verkorte derde sneltrajek oor 327 km tussen Bisha en Al Henakiyah in Saoedi-Arabië met 33 sekondes voor sy naaste mededinger gewen.Variawa het toe die rekord van sy TGR-spanmaat Seth Quintero, wat twee dae tevore as 22-jarige die jongste sneltrajek-wenner in die motorafdeling geword het, heeltemal verpletter.Variawa het tussendeur die veldtydren per e-pos aan Netwerk24 gesê hy was net vyf toe hy in sy pa en oupa se voetspore begin volg het deur te begin jaag met renstelle.Sy oupa Abdul (1970 tot 1990) en pa, Shameer (1991-2019), was ook gesoute veldtydrenjaers met sy pa wat nog in 2019 ’n Dakar-mededinger was.“Ek het die eerste plaaslike kadetkampioenskap gewen waaraan ek deelgeneem het en verder gevorder na ’n groter klas.”Variawa het vinnig deur die klasse geklim en voordat hy sy oë behoorlik kon uitvee was hy reeds mededingend op internasionale renbane.Daar was nie eens tyd vir skool nie, met Variawa wat vanaf gr. 6 weens sy internasionale verpligtinge op die baan aanlyn skool moes bywoon.“Ek het toe begin deelneem aan die World Series-karting (WSK)-reeks en die FIA, motorsport se beheerliggaam, se kampioenskap.“Ek het redelik goed gevaar en baie top-vyf- en top-tien- plekke behaal. Ek het dit geniet.”Volgens hom was hy vir 27 naweke van die jaar op ’n renbaan êrens in Europa besig, daarom was daar nie tyd vir skool nie.Hy sê net voor die Covid-19-pandemie sy kop uitgesteek het, was sy groot droom om ’n F1-renjaer te word.Hy het selfs reeds ooreenkomste in plek gehad vir Formule 3 en 4.“Ongelukkig toe Covid gekom het, het daardie planne soort van gestop, maar toe begin ek ernstig plaaslik deelneem.”Hy het deelgeneem in die Super Cup wat net onder die hoofklas in Suid-Afrikaanse motorsport was.Goeie uitslae en podiums het gevolg, wat ook daartoe gelei het dat Toyota hom ’n toets gegee het in ’n Global Touring Car (GTC)-motor.“Ek kon byhou met die Toyota-renjaers en is toe ’n plek aangebied om deel te neem in die reeks vir 2022.”Hy het tweede geëindig in die kampioenskap in 2022 en in 2023 op 18-jarige ouderdom het hy die reeks gewen.Dit het daardie jaar ook die deure vir hom oopgemaak om in ’n Toyota Hilux te klim en nou neem hy al aan sy tweede Dakar deel.Die jong man sê wat sy toekoms betref, is motorsport sy fokus, want hoewel hy wil studeer laat sy program hom tans net nie toe nie.Gewoonlik praat renjaers van Ayrton Senna of Sébastien Loeb as dit kom by inspirasie, maar Variawa noem sy oupa en pa eerste op sy lys.“My pa is in dié stadium my held en mentor. Hy het my alles geleer wat ek weet. Ek het die voordeel om ’n pa te hê wat ’n renjaer was en nie baie het daardie voordeel in hul loopbaan nie. So, dit het my baie gehelp vandat ek klein was.”Variawa sê buiten motorsport, het hy nie baie vrye tyd nie en hy kyk of ondersteun nie eens enige ander sportsoorte nie.“Dis moeilik, want ek help my pa die motors bou en is tans deel van die verkoopspan, so elke dag is daar iets te doen met motorsport. Tog hou ek nou en dan van ’n wegbreek in die natuur en natuurlik is daar is geen beter plek as Suid-Afrika daarvoor nie.”Oor sy Dakar-rekord verklap hy dat hy aanvanklik nie eens geweet het daar is so ’n rekord nie.“Dit is iets spesiaals, noudat ek dit bereik het. Toe Seth (sy spanmaat) dit die vorige dag bereik het, het dit my aangespoor en ek het gesê dit is iets wat ek ook kon doen. Ons het hard gedruk, gefokus en dit behaal.”Shameer, Variawa se pa, ook die TGR-spanbestuurder, het self drie Dakar-veldtydrenne agter die rug in ’n motorsportloopbaan van 27 jaar en sê hy is verheug om sy seun te sien presteer.“Ons kom van ’n motorsportfamilie, so dis wonderlik om te sien Saood doen ook goed en presteer. Dit kom natuurlik al ’n lang pad en ek dink dit is net harde werk wat nou vrugte afwerp,” sê Shameer.Die Dakar-ren duur tot Vrydag. - Netwerk24

Saood volg in sy pa en oupa se voetspore

Kommentaar

Republikein 2025-04-01

Meld asseblief aan om kommentaar te lewer

Saood volg in sy pa en oupa se voetspore

Kommentaar

Republikein 2025-04-01

Meld asseblief aan om kommentaar te lewer

MELD AAN

Advertensie