Vroue se triomf teen RSA ’n mylpaal

’n Besonderse jaar vir Namibiese hokkie is afgesluit met die nasionale binnenshuise vrouespan se triomf in die eindstryd van die driehoekige Nkosi-bekertoernooi in Kaapstad.

Met Dinsdagaand se oorwinning met 4-2 teen Suid-Afrika het afrigter Shayne Cormack se vrouespan hul aandele laat styg.

Kiana-Ché Cormack is welverdiend as speler van die toernooi aangewys, nadat sy met twaalf doele meer as dubbeld soveel as die volgende speler, Edith Molikoe (5) van Suid-Afrika, aangeteken het. Sy was gewis die skerpste aanvalswapen, met Gillian Hermanus (1) en Azaylee Philander (1) die enigste ander spanmaats wat gedurende die toernooi doele kon afrond.

Kiana-Ché het in die eindstryd drie doele behaal, almal vanaf strafhoekhoue, ná die openingsdoel deur Hermanus binne die eerste 40 sekondes, waarin Marcia Venter die laaste aangee gegee het.

Die vrouespan het ’n redelik omvattende oorgangsfase deurgegaan vandat hulle in Februarie vanjaar geen wedstryd by die Binnenshuise Wêreldbeker in Pretoria kon wen nie, insluitend die uitspeel vir die 11de en 12de (laaste) posisie teen Nieu-Seeland.

Sedertdien het die span se paaie geskei van Erwin Handura ná ’n era wat ook vele hoogtepunte opgelewer het. Voor die reeks in Kaapstad het Cormack die 25-jarige Gillian Hermanus as die nuwe spankaptein aangewys.

Voor ’n stampvol binnenshuise sentrum by die Wynberg Militêre Basis het Hermanus se vroeë openingsdoel en Kiana Cormack se eerste doel die Suid-Afrikaners op die agtervoet geplaas, maar die tuisspan het stelselmatig ook hul gesag begin afdwing.

Malikah Hamza het vanaf ’n strafhoekhou gesorg dat hulle agterstand rustyd net een doel was. ’n Puik teenaanval ná halftyd is deur Cailynn den Bakker afgerond, wat die telling gelykop gemaak en aan die Suid-Afrikaners die geloof gegee het dat die momentum aan hul kant was.

Voor die einde van die derde kwart was dit egter Namibië wat volgende die voortou danksy Kiana Cormack vanaf ’n strafhoek geneem het. Vir haar driekuns het sy ’n puik stukkie spel gelewer om die bal hoog en wyd verby doelwagter Cheree Greyvenstein te skiet.

Namibië se doelwagter Petro Stoffberg is agterna as die beste in die toernooi bekroon, met haar spanmaat Gillian Hermanus as die speler van die eindstryd. Kiana Cormack het die toekennings as voorste doelskieter én speler van die toernooi ontvang.

MANS

In die manseindstryd het Suid-Afrika ’n uitmuntende spelpeil gehandhaaf om die stryd tussen twee wêreldklas spanne met 10-2 te oorheers.

Nadat afrigter Trevor Cormack se manne twee dae tevore ’n oorwinning met 5-2 teen die Suid-Afrikaners kon vier, was die skoen dié keer aan die ander voet.

Die akkuraatheid van die Blitsstokke se strategie en uitvoering was eenvoudig in ’n ander klas en sal beslis as ’n motivering vir die Land of the Brave se manne dien om hul vlak voortdurend te bly lig.

Namibië se enigste teenvoeter nadat hulle reeds met 5-0 agter was, was twee doele deur Liam Hermanus, boonop op sy verjaarsdag.

Die gasheerspan was hoogs gemotiveerd om te vergoed vir hul nederlaag teen Namibië in die eindstryd van ’n sesnasietoernooi in Maleisië verlede maand en het behoorlik die krane oopgedraai.

Die Suid-Afrikaners het weggestap met die toekennings aan die speler van die eindstryd (Dayaan Cassiem), voorste doelskieter in die toernooi (Mustapha Cassiem met 11) en topspeler van die toernooi (Mustapha Cassiem)

Richter van Rooyen (Namibië) is as doelwagter van die toernooi bekroon – ’n toonbeeld van sy puik vordering ná jare as die troonopvolger vir die spankaptein DJ Strauss.