Afrikaspele lok atlete na tweede Grand Prix

Atletiek Namibië se tweede Grand Prix-byeenkoms van die seisoen word môre as ’n dag-aand geleentheid by die Onafhanklikheidstadion in die hoofstad aangebied.Dis nog vroeg in die seisoen, maar hoopvolle baan- en veldatlete van oraloor die land sal gretig wees om te wys waar hulle vordering tans staan.Die sperdatum om vir die Afrika-spele in Ghana te kwalifiseer, is 20 Februarie en Namibië se span is dus nog nie gefinaliseer nie. Met dié aantreklike geelwortel voor die atlete as aansporing, kan goeie vertonings verwag word.Die 24 items op die program sal môre om 16:00 met die 400 meter-naellope vir vroue en mans afgesit word – wat sommer dadelik een van die groot hoogtepunte kan bied. Die 400 vir mans sal beslis vir opwinding sorg. Mahmad Bock, die nasionale rekordhouer (45.80 sekondes), is klaar met sy opleiding as korrektiewe beampte en sal beslis sy vaart wil wys. Hy kan strawwe mededinging verwag van die ewe ambisieuse André Retief en Ivan Danny Geldenhuys. Dié trio was spanmaats vir Namibië by die 2022 Statebondspele in Birmingham. Elvis Gaseb kan as buiteperd ook verras.Die 100 en 200 vir mans behoort ewe warm te wees. By die eerste GP in Swakopmund het Gilbert Hainuca (10.67) en Elvis Gaseb (10.72) vroeg in die seisoen skaflike tye op kusvlak behaal. Hatago Murere is ’n haastige vooruitsig wat goeie vordering maak en Bock kan moontlik ook vir die 100 of 200 in die wegspringblokke sak.Die opkomende spoedvraat, Elton Hoeseb, tree vir die 100, 200 en 400 aan.Die T46-atleet (arm geamputeer), Bradley Murere, het in 2023 tydens die Namibiese kampioenskap 11.06 behaal. Paralimpiese atlete is by môre se program ingesluit en sal ook met goeie vertonings hul kleim vir die Afrikaspele in Ghana, asook ander internasionale geleenthede kan afsteek.David Dam is ook terug op die baan ná sy opleiding as lid van die Namibiese Korrektiewe Dienste. Hy het verlede maand in Swakopmund die 1 500 meter in 3 minute 58.1 sekondes gewen. Sy teenwoordigheid behoort nuwe lewe in die 1 500 en 800 te blaas.Dam se spanmaat, Daniel Paulus, is die Namibiese rekordhouer vir die halfmarathon en marathon. Hy sal na verwagting sy staal in die 5 000 wys waar hy onder andere deur Simon Nakale en Arno Angula gedruk sal word.Die verspringer Lionel Coetzee, diskusgooier Ryan Williams, gewigstoter Tuané Silver en driesprongatleet Frieda Ithete is nog vier nasionale rekordhouers wie se deelname verwag word. Ndawana Haitembu en Jade Nangula het onlangs by die kus hul vaart in die 100 uitgestal, waar die 200 nie vir vroue aangebied was nie. Dié nommer is wel môre op die program. In die middelafstande lewer Nyanyukweni Frans en Saara Shikongo gewoonlik ’n hewige tweestryd. Wie van hulle gaan môreaand die 800 wen? – tielman@republikein.com.na

Afrikaspele lok atlete na tweede Grand Prix

Kommentaar

Republikein 2025-04-07

Meld asseblief aan om kommentaar te lewer

Afrikaspele lok atlete na tweede Grand Prix

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie