5G is hier

“In 2021 en 2022 het ons die verspreiding van vals inligting, soos dat 5G gevalle van Covid-19 veroorsaak, gesien. Dit is nie waar nie!”

So het die uitvoerende hoof van die Regulerende Owerheid vir Kommunikasie in Namibië (Cran), Emilia Nghikembua, gister by Droombos buite Windhoek by ʼn bewusmakingsveldtog gesê.

Die veldtog het ten doel om Namibiërs in te lig oor die verskeie voordele van verbeterde kommunikasietegnologie en ook om waninligting oor 5G te bekamp.

Sy het klem daarop gelê dat die radioseine wat vir 5G gebruik word, dieselfde is as dié wat vir televisiestelle en algemene 3G-selfone gebruik word.

“Studies deur die Wêreldgesondheidsorganisasie (WHO) het 5G goedgekeur en gevind dat kortgolf-bestraling binne een meter van die basisstasie verdwyn.

“Verder, oor die lang termyn, sou blootstelling aan veelvuldige X-strale of ure in die son meer skade aanrig,” het sy bygevoeg.

Nghikembua sê 5G-tegnologie benodig meer basisstasies terwyl seine meer data op korter golflengtes bevat. Dit maak plek vir meer verkeer en die koppeling van meer toestelle, wat die kommunikasie tussen persoon tot persoon, of persoon tot masjien, of masjien tot masjien verbeter.

“Toegang tot inligting in werklike tyd, afstandbeheer van toestelle, dit is hier en dit is nou,” sê sy.

In September, ná ’n bandwydte-veiling, het Cran 5G-lisensies en -spektrum aan Telecom Namibia, MTC en ’n gesamentlike onderneming tussen die NBC en Loc8 Mobile toegeken.

Die spektrum is ingevolge die betrokke ondernemings se besigheidsplanne toegeken en dié telekommunikasie-operateurs het 12 maande om hul infrastruktuur te begin uitrol, het Nghikembua gesê.

“Ons probeer altyd om universele dekking te bevorder en dus het elke lisensie ook verpligtinge, soos om ook die 4G-netwerk in streke waar minder as 80% van inwoners dit gebruik, te verbeter. Dit sluit die Kunene, Kavango-Wes, Otjozondjupa en Omaheke in,” sê sy.

Verder vestig Cran ook ’n eenheid om op kuberaanvalle te reageer.

“Soos ons tegnologie verbeter, beskerm ons ook burgers teen kubermisdaad,” sê sy.

Die owerheid se mandaat is uitgebrei om hierdie nuwe funksie in te sluit en die regering het vir ’n reaksiespan begroot, voeg sy by.

Die adjunkvoorsitter van die Cran-raad, Elvis Nashilongo, het gesê die bekendstelling van 5G is ’n integrale deel van Namibië se strewe om digitaal uit te brei “deur ultra-vinnige internetspoed en min vertraging, op ’n reuseskaal, wat verskeie bedrywe sal revolusioneer”.

“Met die goedkeuring van die 5G-strategie het die kabinet kennis geneem dat die regering die oorbrugging van die digitale gaping tussen stedelike en landelike gebiede moet prioritiseer, kommunikasiekoste moet verminder en burgers bemagtig, terwyl nywerhede die verlangde ruimte ontvang om deur ontluikende tegnologieë te innoveer,” sê hy.

Nghikembua het ook die uitfasering van 2G-tegnologie by die geleentheid aangekondig.

“Ons het in Augustus met operateurs beraadslaag oor die toekenning van spektrum en saam besluit om 2G uit te faseer.

“Nou ontwikkel ons die strategie daarvoor. Ons weet baie mense is nog afhanklik daarvan en die beskikbaarheid en bekostigbaarheid van nuwe toestelle is ook ’n groot punt van kommer vir die reguleerder.

“Ons het nodig om ons mense saam te bring asook die universele toegang tot bekostigbare toestelle.

“Ons betrek beleidmakers om te sien hoe koste verminder kan word, soos byvoorbeeld in terme van belasting, maar ons moet ook verseker dat mense die kennis het om die nuwe tegnologie te kan gebruik,” sê sy.

Verder doen sy ’n beroep op die ministerie van handel en nywerheid om die nuwe wetsontwerp op verbruikersbeskerming waaraan die ministerie tans werk, te versnel.

“Diensverskaffers moet verantwoordelikheid neem en daar is werklik ’n groot behoefte om verbruikersbeskerming en -bewusmaking te bespoedig,” sê sy. – [email protected]