Ministerie hersien internetbeheer

“Met die hulp van die Internasionale Telekommunikasie-unie (ITU) sal die ministerie binnekort begin met die konsolidasie van die nasionale inligtings- en kommunikasiebeleide.”So het die minister van inligting en kommunikasietegnologie (ICT), dr. Peya Mushelenga, gister gesê tydens die aankondiging dat die wetlike raamwerk vir die ICT-sektor in Namibië hersien word. Die wetsontwerp op kubermisdaad word spesifiek heropgestel. Die beleid en wetlike raamwerk hiervoor is reeds opgetrek, en die nuwe wetsontwerp sal eers aan openbare konsultasie onderwerp word voor dit weer aan die kabinet se komitee oor wetgewing voorgelê sal word.Verder is die wetsontwerp op die beskerming van data ook heropgestel, volgens die minister. Dit nadat konsultasies in die streke en ’n slypskool in dié verband gehou is met finansiering wat die Namibiese Raad vir die Bevordering van Beleggings en Ontwikkeling (NIPDB) ingevorder het. Dié beleid en wetlike raamwerk is ook gereed en die wetsontwerp is gereed om aan die kabinet se komitee oor wetgewing voorgelê te word.Die raadsvoorsitter van die Internet Society Namibia Chapter, Ngarii Tjejamba sê: “Die Internet Society Namibia Chapter verwelkom die pogings van die minister om die manier waarop die regering inligting aan die mense versprei, te versterk en vaartbelyn te maak. Ons glo dat verhoogde deursigtigheid, aanspreeklikheid en toegang tot groter geleenthede en beter begrip vir Namibiërs sal lei, en hulle beter vir die toekoms sal toerus.” “Nadat ons nou saam met die ministerie aan die wetsontwerp op kubermisdaad en databeskerming gewerk het, sal dit ’n impak hê op hoe burgerlike organisasies verandering op kabinetsvlak positief kan beïnvloed,” voeg hy by.Die grootste verandering is egter die besluit om die Wet op Kommunikasie no. 8 van 2009 te herroep en te vervang. Dit weens die groot hoeveelheid voorgestelde aanpassings wat uit die konsultasieproses gespruit het. “Die wysigings aan die Kommunikasiewet van 2009 het afgeskop en konsultasies en wysigings is aan die wetsontwerp aangebring,” voeg Mushelenga by. Die ICT-ministerie wag op die ministerie van justisie vir die nuwe weergawe van hierdie wet, het Mushelenga uitgebrei.Frederico Links, ’n senior navorser verbonde aan die Instituut vir Openbare Beleidsnavorsing (IPPR), sê dit is ’n betekenisvolle verwikkeling, “veral omdat hy aandui dat ’n nuwe wetsontwerp amper gereed is. Dit is egter kommerwekkend dat die proses weer eens nie wye openbare konsultasies ingesluit het nie, maar blykbaar beperk was tot ’n uitgesoekte groep belanghebbendes. “Dit is ’n kwessie waaroor ons steeds krities is, aangesien dit teenstrydig is met die benadering op veelsydige belanghebbendes wat in internetbestuur en tegnologiebeleidsprosesse bevoordeel word, en deur entiteite soos die ITU onderskryf word. “Hopelik sal die konsep van die nuwe kommunikasiewetsontwerp in die publiek beskikbaar gestel word, sodat ’n breër reeks perspektiewe steeds geïnkorporeer kan word voordat die wetsontwerp in die parlement ter tafel gelê word,” sê Links. “Dit is ons siening dat die konsepwette op kubermisdaad en databeskerming wat ons die afgelope jaar of wat gesien het, nie gereed is om ter tafel gelê te word nie, en dat uitgebreide herformulering nodig is om dit in lyn te bring met beste praktyk en beskikbare leiding,” voeg hy by.Op navraag oor die inagneming van insette by konsultasies het Mushelenga gesê 100 belanghebbendes sal 100 verskillende insette oor ’n enkele kwessie kan lewer.“Dit beteken nie al die insette sal in die wetsontwerp geakkommodeer word nie. Die regering hou wye konsultasies en verwerk die insette met die oog op praktiese en lewensvatbare voorstelle wat die belange van die meerderheid bevorder,” sê die minister. – augetto@republikein.com.na

Ministerie hersien internetbeheer

Kommentaar

Republikein 2025-04-02

Meld asseblief aan om kommentaar te lewer

Ministerie hersien internetbeheer

Kommentaar

Republikein 2025-04-02

Meld asseblief aan om kommentaar te lewer

MELD AAN

Advertensie