Swakopmund: Kommer oor '5G'-torings

Die Swakopmund-munisipaliteit is oorval met klagskrifte vanaf verskeie besighede en inwoners oor 'n telekommunikasietoring, wat glo met 5G-tegnologie toegerus sal wees, wat in hul nabygeleë omgewing beplan word.

Om die kapasiteit van telekommunikasie-konnektiwiteit in Swakopmund uit te brei, het Telecom Namibia se filiaal, Powercom, 'n area geïdentifiseer om so 'n toring op te rig, wat glo soortgelyk sal wees aan dosyne torings in die dorp wat vir estetiese doeleindes as palmbome "gekamoefleer" is. Die area ter sprake is by Telecom se Tamariskia-pakhuis, langs die Hentiesbaaipad, en naby verskeie besighede soos 'n kwekery, hospitaal, x-straalsentrum en laboratoriumgeriewe.

Verskeie klagskrifte wat Erongo 24/7 onder oë gehad het, behels vrese dat die toring van die wêreldwyd-omstrede 5G-tegnologie - wat volgens sommige baie skadelik vir biologiese gesondheid is - gebruik sal maak,en dat blootstelling aan 5G-radiogolwe tot 'n wye verskeidenheid siektes, en uiteindelik die dood, kan lei. “Dit is nie iets wat ons kan toelaat nie. Daar is te veel vrae oor 5G, en terwyl dit as 'n meer doeltreffende telekommunikasietegnologie bemark word, is daar baie min studies wat wys dat dit nie gevaarlik is nie,” het 'n besorgde sake-eienaar gesê.

’n Omgewingsimpakstudie is van stapel gestuur, maar belangstellende en betrokke partye is nie oortuig van die deursigtigheid van die proses nie. Een van die versoekskrifte lui dat die toring in 'n besige openbare ruimte sal wees, met 'n speelgrond, restaurant en dosyne werkers, sowel as pasiënte van die hospitaal. “Hierdie torings kan alle biologiese lewe beïnvloed; dit sluit bye, visse, plante en bowenal 'n mens se gesondheid in. Sou dit gebeur, sal dit die einde van my besigheid wees." Verwysings is gemaak na 5G-tegnologie wat binnekort in Windhoek uitgerol gaan word om dit 'n "slim stad" te maak, en dat dieselfde vir Swakopmund beoog word. “Ek glo nie enige 4G- of 5G-diensverskaffer kan op hierdie tydstip aan ons bewys dat hierdie torings nie gevaarlik vir mense is nie. Hulle moet die torings ver van woongebiede en waar mense werk bou,” het ’n inwoner gesê.

Telecom Namibia se hoof van korporatiewe kommunikasie, Nomvula Kambinda, het aan Erongo 24/7 gesê sy mobiele radionetwerkontplooiings is tot op hede beperk tot 2G-, 3G- en 4G-tegnologie. "Telecom Namibia het geen onmiddellike planne om 5G-tegnologie te ontplooi nie, maar evalueer die lewensvatbaarheid daarvan," het sy gesê en bygevoeg die ontplooiing van 5G is onderhewig daaraan dat die Regulerende Owerheid vir Kommunikasie in Namibië (Cran) magtiging van die kabinet ontvang.

Alfeus Benjamin, uitvoerende hoof van die Swakopmund-dorpsraad, het gesê hy is bewus van al die bekommernisse en dat die saak binnekort deur die raad se bestuurskomitee bespreek sal word. Volgens hom het die munisipaliteit verlede jaar 'n aansoek ontvang vir uitbreiding van ontvangstorings, veral in die oostelike dele van die dorp, as deel van 'n program om konnektiwiteit te verbeter. Hy het gesê elke aansoek moet deur 'n goedkeuringsproses gaan, waarna die raad 'n finale besluit neem.

Volgens Benjamin is die voorneme vir die projek geadverteer, waardeur die publiek genooi is om 'n aantal konsultasiesessies by te woon, maar dit is "swak bygewoon". Hy bygevoeg die besware wat ontvang is sal binnekort hersien word en dat die raad daarna oor die volgende stap sal besluit. Volgens hom is daar geen 5G-planne vir Swakopmund nie, aangesien dit nog nie eens deur die regering goedgekeur is nie.