Asielsoekers verminder van 1 000 tot vyf

Mariud Ngula - Namibiese aansoeke om asiel in die Verenigde Koninkryk (VK) het van 1 000 tot vyf gedaal sedert die land verlede jaar gratis visums aan Namibiërs afgeskaf het.Dié getal is deur die Britse hoë kommissaris, Charles Moore, op die aktualiteitsprogram The Agenda bevestig. Hoewel hy erken het dat Brittanje se optrede onwelkom was en ’n uitwerking op die twee lande se bilaterale verhouding gehad het, sê Moore dit het ’n nadelige impak op die Britse ekonomie gehad en dit moes gedoen word.“Ek verstaan die frustrasies wat dit uitgelok het onmiddellik nadat die visumregime deur Brittanje aangekondig is. Vir maande was ons duidelik daaroor dat ons dit nie sou doen nie.“Ons het dit egter uiteindelik ingestel weens die onvolhoubare en aansienlike toename in die aantal Namibiërs wat by hul aankoms in Brittanje om asiel aansoek gedoen het,” het hy gesê.In die jare tot en met Julie verlede jaar het meer as 1 000 Namibiërs om asiel aansoek gedoen, die hoogste getal op enige plek ter wêreld vir lande wat toe nie ’n visum benodig het nie.“In die tydperk daarna het die aantal aansoeke vir asiel van 1 000 na vyf verminder,” het Moore gesê.Volgens hom het mense aansoek gedoen bloot om voordeel uit die grasietydperk van 18 maande te trek.“Dit is verkeerd. Die toename het in net meer as ’n jaar plaasgevind en dit het erger geword en sou erger word as ons nie ’n visumregime in werking gestel het nie.”Gedurende die grasietydperk het die VK aansoekers van verblyf, kos en werksgeleenthede voorsien.“Dit neem nou 15 werksdae vir ’n visum om uitgereik te word, iets waaraan Namibiërs vir 34 jaar nie gewoond was nie,” het Moore gesê.Na bewering het die meeste aansoekers die gronde van homoseksualiteit gebruik en dat hulle vir hul lewens gevrees het.“Hoewel ons nie spesifieke data het oor hoekom individue asiel soek nie, is dit bekend dat baie beweer hulle is vervolg omdat hulle gay is.“Ek was nog altyd baie duidelik daaroor dat ek aan absoluut geen rede kan dink hoekom enige Namibiër geregtig is om asiel te kry nie. Dit is ’n stabiele, vreedsame demokrasie waar mense nie aan die hand van die regering in hegtenis geneem en vervolg word of verdwyn nie.”Hy het egter beklemtoon dat die land altyd oop is om sekuriteit te bied aan diegene wat dit nodig het en wat dit nie elders sal vind nie. Moore sê egter onwettige immigrante bied beduidende uitdagings, waaronder die feit dat hulle ’n negatiewe ekonomiese impak op die VK het, insluitend die hoë koste verbonde aan hul verwydering. “Die situasie plaas druk op ons openbare finansies. Dit is noodsaaklik om ons grense te beskerm. Net soos die VK die reg het om sy visumregime af te dwing, het Namibië as ’n soewereine land die reg om sy grense te beheer en te bepaal wie mag die land binnekom.” – republikein@republikein.com.na

Asielsoekers verminder van 1 000 tot vyf

Kommentaar

Republikein 2025-04-04

Meld asseblief aan om kommentaar te lewer

Asielsoekers verminder van 1 000 tot vyf

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie