‘Ek het lief vir die natuur geraak’

Kenya Kambowe op Divundu – Ná 18 jaar se ondervinding as werknemer by verskeie plaaslike toerisme-ondernemings, het die 36-jarige Emmanuel Karel Kasoma sy eie onderneming, Emms Cubango Ecological Camp, in 2018 begin – wat tans 27 mense in diens het.Kasoma, beter bekend as Emms, kan 37 tale praat en is een van die Namibiese entrepreneurs wat die titel “black excellence” gestand hou. Op ’n onlangse besoek aan die informele nedersetting Bagani wat ’n paar kilometer oos van Divundu in die Kavango-Oosstreek geleë is, het ons susterkoerant Namibian Sun die vriendelike en nederige Emms gaan besoek. Hy het vertel hoe hy sy droom om ’n ingenieur te word, moes laat vaar om die toerismeroete te volg.“Toe ek jonk was, wou ek altyd ’n ingenieur word, maar ek het lief vir die natuur geraak en ek het nooit teruggekyk nie. Ek is nie spyt oor daardie keuse nie, want andersins sou Emms Cubango Ecological Camp nie bestaan het nie,” het hy gesê.Volgens hom het hy vir minstens 18 lodges gewerk sedert sy eerste werk as veldgids by Divava Lodge wat in sy nedersetting geleë is.Emms het gesê hy het besef dat die inkomste wat hy as werknemers ontvang het, nie sy ervaring, kwalifikasie en kennis wat hy oor die jare opgedoen het, regverdig het nie en daarom het hy sy eie onderneming begin.Hy het sy spaargeld gebruik en grond langs die oewer van die Kavangorivier gekoop vir sy onderneming.Emms se visie is om baie medejongmense in die toerismesektor op te lei en hulle te motiveer om nes hy, met inisiatiewe vorendag te kom.“Ek is trots daarop dat ek opgehou het om vir ander te werk en nou ’n werkgewer van ander is, maar dit is nie hoekom ek Emms Cubango gestig het nie. My visie is om baie jong Namibiërs te sien wat hierdie miljarddollarbedryf benut.”Emms sê aangesien sy vorige werknemers nie sy waarde besef het nie, het hy dit sy missie gemaak om te verseker dat sy eie werknemers onder die bes betaalde werkers in die omgewing is.“Sommige lodges betaal hul werkers ’n minimum van N$1 500, maar die laags betaalde werknemer op my betaalstaat kry ten minste N$2 500. Ek sorg goed vir my werknemers, ons kommunikeer soos ’n gesin, want sonder hulle is ek niks,” het hy gesê.Die kamp word deur sonkrag aangedryf en maak gebruik van water wat deur omgekeerde-osmose (reverse osmosis) gesuiwer is.“Emms Cubango Ecological Camp is een van die unieke toerisme-ondernemings in die Kavango-Oosstreek. Dit bied dag en nag ’n uitsig oor die Kavangorivier en die eiland oorkant die rivier.”TOERISME-EKSPOEmms Cubango Ecological Camp was ’n uitstaller by die 2022 Toerisme Ekspo wat in Windhoek aangebied is en Emms het gesê dat hulle in die toekoms ook deel van die ekspo sal wees. Die kamp het groot belangstelling by die ekspo ontvang.“Dit was ons eerste keer by die toerisme-ekspo en toe ons vandaar af terugkom, het omtrent 70% van die mense wat ons stalletjie besoek het na ons kamp gekom. Ek kan nie wag vir hierdie jaar se ekspo nie,” het Emms gesê. – republikein@republikein.com.na

‘Ek het lief vir die natuur geraak’

Kommentaar

Republikein 2025-04-11

Meld asseblief aan om kommentaar te lewer

‘Ek het lief vir die natuur geraak’

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie