Etosha-paaie kry aandag
N$700 miljoen oor vyf jaar belê
Die Padfondsadministrasie het 'n amptelike ooreenkoms onderteken om die ministerie van toerisme te ondersteun.
Oor die volgende vyf jaar sal die padnetwerk van meer as 1 000 km in die Etosha Nasionale Park – wat 24 000 km² beslaan – opgeknap word om met die standaard van Suid-Afrika se Krugerwildtuin te kan meeding, volgens die uitvoerende direkteur van die omgewing, bosbou en toerisme, Teofilus Nghitila.
Hy en Ali Ipinge, die uitvoerende hoof van die Padfondsadministrasie (RFA), het Woensdag ’n ooreenkoms vir N$700 miljoen onderteken om dié padwerke te finansier.
Sowat N$50 miljoen is reeds in beide die boekjare 2020-’21 en 2021-’22 op Etosha se paaie bestee, het die RFA se senior ingenieur, Nehemiah Kapofi, gesê.
Ipinge sê die regering bewillig gereeld fondse om “toeristepaaie” landswyd op te knap.
In Etosha is 271 km se grondpaaie sedert 2020 opgeknap. Dit nadat die kabinet opdrag aan die RFA gegee het om die ministerie te ondersteun. Ipinge sê altesaam is sowat N$200 miljoen op Etosha se paaie bestee, met die RFA wat sowat 79% van dié koste gedek het.
’n Groot deel van die vyfjaarprojek is om die pad wat deur die hart van Etosha loop – vanaf Okaukuejo deur Halali tot by die King Nehale-hek – te teer. Grondpaaie en toegangspaaie tot by die watergate word ook opgeknap.
Etosha se paaie dra jaarliks verkeer van tussen 43 000 en 44 000 voertuie. “Dit is baie verkeer,” sê Ipinge.
Met normale instandhouding is die nuwe teerpad se lewensduur steeds ten minste 15 jaar, voeg hy by.
“Die ministerie van die omgewing, bosbou en toerisme sal moet verseker dat voertuigeienaars by die hekke tot die pad se instandhoudingskoste bydra, deur in die toekoms ’n tarief ten gunste van ’n infrastruktuurfonds te hef,” sê die RFA-hoof.
Nghitila het uitgelig dat Etosha Namibië se voorste toeristetrekpleister is, en sê die onderhoud van die park se paaie is ’n groot projek om aan te pak.
“Etosha is die nasionale toerismevlagskip. Destyds het ons vir die reënseisoen toegemaak, en ons werknemers het daardie tyd gebruik om die paaie te rehabiliteer. Die ministerie was destyds goed toegerus, met die nodige kapasiteit, wat nou nie meer daar is nie. Ons het in 2019 probeer om dit self te doen, maar ons kon nie. Die toerusting was toe al te oud en ons padoperateurs het al afgetree. Ons moes na alternatiewe soek omdat die situasie ondraaglik geword het weens klagte van toeriste, toeroperateurs en oordeienaars,” brei hy uit.
“Die meerderheid van ons paaie (in Etosha) is nou in ’n goeie toestand. Besoekers kla nie en die kampe is weer vol, wat meer inkomste vir die staat beteken. Met die vyfjaarprojek sal ons Etosha se paaie op dieselfde standaard as byvoorbeeld die Krugerwildtuin bring. Ek verwag verkeer sal vermeerder in terme van plaaslike toeriste en besoekers. Kom sien self en waardeer die werk wat ons doen. Jy kan selfs met ’n sedanvoertuig die park besoek. Die paaie is nou glad,” sê Nghitila.
Ipinge sê die geld kom van bestaande bronne en word nie geleen nie, dus, “as finansierders sou ons wou hê betroubare plaaslike kontrakteurs moet aangestel word. Dit bly egter die verantwoordelikheid van die ministerie,” sê hy.
Nghitila sê egter die projek se waarde is hoër as die drempel gestel deur die 2015 Verkrygingswet en dus sal die Sentrale Verkrygingsraad outomaties die kontrakte moet toeken, sê hy.
– [email protected]
Hy en Ali Ipinge, die uitvoerende hoof van die Padfondsadministrasie (RFA), het Woensdag ’n ooreenkoms vir N$700 miljoen onderteken om dié padwerke te finansier.
Sowat N$50 miljoen is reeds in beide die boekjare 2020-’21 en 2021-’22 op Etosha se paaie bestee, het die RFA se senior ingenieur, Nehemiah Kapofi, gesê.
Ipinge sê die regering bewillig gereeld fondse om “toeristepaaie” landswyd op te knap.
In Etosha is 271 km se grondpaaie sedert 2020 opgeknap. Dit nadat die kabinet opdrag aan die RFA gegee het om die ministerie te ondersteun. Ipinge sê altesaam is sowat N$200 miljoen op Etosha se paaie bestee, met die RFA wat sowat 79% van dié koste gedek het.
’n Groot deel van die vyfjaarprojek is om die pad wat deur die hart van Etosha loop – vanaf Okaukuejo deur Halali tot by die King Nehale-hek – te teer. Grondpaaie en toegangspaaie tot by die watergate word ook opgeknap.
Etosha se paaie dra jaarliks verkeer van tussen 43 000 en 44 000 voertuie. “Dit is baie verkeer,” sê Ipinge.
Met normale instandhouding is die nuwe teerpad se lewensduur steeds ten minste 15 jaar, voeg hy by.
“Die ministerie van die omgewing, bosbou en toerisme sal moet verseker dat voertuigeienaars by die hekke tot die pad se instandhoudingskoste bydra, deur in die toekoms ’n tarief ten gunste van ’n infrastruktuurfonds te hef,” sê die RFA-hoof.
Nghitila het uitgelig dat Etosha Namibië se voorste toeristetrekpleister is, en sê die onderhoud van die park se paaie is ’n groot projek om aan te pak.
“Etosha is die nasionale toerismevlagskip. Destyds het ons vir die reënseisoen toegemaak, en ons werknemers het daardie tyd gebruik om die paaie te rehabiliteer. Die ministerie was destyds goed toegerus, met die nodige kapasiteit, wat nou nie meer daar is nie. Ons het in 2019 probeer om dit self te doen, maar ons kon nie. Die toerusting was toe al te oud en ons padoperateurs het al afgetree. Ons moes na alternatiewe soek omdat die situasie ondraaglik geword het weens klagte van toeriste, toeroperateurs en oordeienaars,” brei hy uit.
“Die meerderheid van ons paaie (in Etosha) is nou in ’n goeie toestand. Besoekers kla nie en die kampe is weer vol, wat meer inkomste vir die staat beteken. Met die vyfjaarprojek sal ons Etosha se paaie op dieselfde standaard as byvoorbeeld die Krugerwildtuin bring. Ek verwag verkeer sal vermeerder in terme van plaaslike toeriste en besoekers. Kom sien self en waardeer die werk wat ons doen. Jy kan selfs met ’n sedanvoertuig die park besoek. Die paaie is nou glad,” sê Nghitila.
Ipinge sê die geld kom van bestaande bronne en word nie geleen nie, dus, “as finansierders sou ons wou hê betroubare plaaslike kontrakteurs moet aangestel word. Dit bly egter die verantwoordelikheid van die ministerie,” sê hy.
Nghitila sê egter die projek se waarde is hoër as die drempel gestel deur die 2015 Verkrygingswet en dus sal die Sentrale Verkrygingsraad outomaties die kontrakte moet toeken, sê hy.
– [email protected]
Kommentaar
JC Nel
Tog te verheug om dit te hoor - is daar nie nog paar dollars oor vir die Solitaire - Kuiseb gedeelte nie?