Groot talent op die verhoog by vanjaar se Toerisme Ekspo

Big Ben, The Ell’s en Arthur is van die kunstenaars wat op die verhoog te sien sal wees by die komende Toerisme Ekspo (TE), wat vanaf 26 tot 28 April by die Windhoek Buiteklub aangebied word.

Big Ben, bekend as een van die beste verhoogkunstenaars in die land, se klank is uniek Namibies, maar vind wêreldwyd aanklank.

Sy musiek het hom reeds talle toekennings besorg en te danke daaraan kon hy die verhoog deel met van die grootste name in die Afrika-musiekbedryf, insluitend Salif Keita en Zahara.

Die dinamiese duo The Ell’s het gewildheid verwerf oraloor Namibië en die SADC-streek vir hul foutlose klank en harmonie. Slickartie en Mannie domineer die verhoog met hul sagte dog kragtige stemme en “organiese” kombinasie van kitaar, sang en perkussie. Hulle sal na verwagting Woensdag 26 April vanaf 20:00 op die verhoog te sien wees.

Intussen het Arthur – die voorsanger van The Yesterdays – skares betower met sy sterk stem en passievolle kitaarspel.

Sy vokale en liedjieskryfvermoëns het hom al staande toejuigings by gemeenskaps- en korporatiewe geleenthede besorg. Sy optrede is ook vir Woensdag vanaf 18:00 geskeduleer.

Saam sal Big Ben, The Ell’s en Arthur verseker ’n opwindende atmosfeer by die ekspo skep. Besoekers kan ’n unieke mengsel van Namibiese en universele klanke verwag wat jou sal laat vra vir ’n encore.

Moenie hierdie ongelooflike geleentheid misloop om van Namibië se mees talentvolle musikante in aksie te sien nie!

Ander optredes op die program sluit in Lin-Mari & JP, Vocalfront en Savannah Collins.