Hof stop bou van mynpad in toerismekonsessie

’n Interdik is die afgelope naweek uitgereik wat beplande mynbedrywighede en die bou van ’n nuwe pad in ’n toerisme-konsessiegebied in die Khorixas-distrik tydelik verbied.Dit volg nadat Ultimate Safaris asook die bewaringsgebiede van Sorris Sorris, Doro !Nawas en Uibasen Twyfelfontein ’n dringende aansoek in die hoërhof teen Timoteus Mashuna, die adjunkdirekteur van beleidsnavorsing en registrasiedienste in die ministerie van verdediging en veteranesake ingedien het.Mashuna het nege mynkleims vir onedel en skaarsmetale, nywerheidsminerale en edel- en halfedelstene in die gebied geregistreer. Die gebied is egter ’n gesamentlike bestuursgebied tussen die drie bewaringsgebiede, terwyl afsonderlike gesamentlike ooreenkomste in plek is met Ultimate Safaris.Volgens die hofbevel wat Saterdag uitgereik is, mag Mashuna – of enige persoon wat in sy diens is of onder sy leiding optree – nie swaar masjinerie, insluitend skrapers, graafmasjiene en wipbakvragmotors, gebruik om ’n nuwe pad vanaf die D2612 in ’n westelike rigting na die perseel te bou nie.Ultimate Safaris se besturende direkteur, Tristan Cowley, het gesê hulle sal nou 14 dae vanaf die datum van die hofbevel hê om ’n hersieningsproses met die omgewingskommissaris van stapel te stuur met betrekking tot die omgewingsklaringsertifikaat (EIA) wat aan Mashunga uitgereik is vir mynbedrywighede in dié gebied.“Dan moet ’n besluit geneem word en ons het die reg om teen dié besluit in die hof te appelleer. Totdat daardie appèlproses verby is, word hulle nie toegelaat om met enige bedrywighede voort te gaan nie.”‘DIS SKOKKEND’Cowley het gesê hulle het verlede Woensdag van die mynbedrywighede verneem van kontrakteurs op die grond naby hul Onduli- en Doros-eiendomme. Hulle het Vrydag verneem dat daar begin is om ’n pad te bou wat glo die breedte van ’n distrikspad is.“Dit is in stryd met die bepalings van hul omgewingsimpak- en omgewingsbestuursplan, wat bepaal dat hulle slegs bestaande paaie sal gebruik en met toerisme-operateurs in die gebied sal konsulteer, wat natuurlik nie die geval was nie.”Volgens Cowley het hulle ’n aansoek om ’n dringende interdik namens die bewaringsgebiede Doro !Nawas, Uibasen Twyfelfontein, Sorris Sorris en hulself ingedien, wat Saterdagaand toegestaan is en die hof het beveel dat alle bedrywighede gestaak word.“Dit is opmerklik dat die betrokke gebied as ’n kerngebied vir die teel van swartrenoster verklaar is en al drie bewaringsgebiede het in hul wildbestuur- en benuttingsplanne (GMUP) gesê dat geen mynbedrywighede hier kan plaasvind nie.”Hy het gesê dié planne moes by die ministerie van die omgewing, bosbou en toerisme ingedien word en dit is ’n vereiste waarsonder bewaringsgebiede geen jagkwotas ontvang nie.“Die feit dat die ministerie dit het en die direktoraat van omgewingsake steeds ’n omgewingsklaringsertifikaat (ECC) uitgereik het, is skokkend."VERNIETIGINGIn foto’s kan gesien word dat die pad wat na die mynperseel gebou is, oor die Onduli-ingangspad geskraap is, verby ’n bord wat stipuleer “geen toegang” en “private konsessie”.Karin Klazen van Ellis Shilengudwa Incorporated het namens die aansoekers in ’n brief aan Mashuna gesê hulle beplan om regstappe teen hom te bring vir beweerde omgewingsvernietiging wat volgens hulle onwettig in die bewaringsgebiede veroorsaak is tydens die konstruksie van die pad.Luidens die brief is die bewaringsgebiede in die proses om ook ’n strafregtelike klag teen hom in te dien ingevolge die wet op omgewingsbestuur.MILJOENE BELÊUltimate Safaris het glo byna N$70 miljoen in infrastruktuur, die gemeenskap en bewaring in hierdie gebiede belê en al drie bewaringsgebiede is aktiewe gesamentlike vennote in hul huidige drie persele in die gebied, naamlik Onduli Ridge, Onduli Enclave en Camp Doros.“Ons is gereed om later vanjaar nog ’n lodge in die gesamentlike bestuursgebied, Doros Plains, te bou. Dit is nog ’n belegging van N$30 miljoen,” het Cowley gesê.Sodra dié vierde kamp oop is, sal hierdie kampe jaarliks gesamentlik meer as N$3 miljoen in kontant vir die bewaringsgebiede genereer, asook meer as N$12 miljoen in salarisse en verblyfstoelaes vir die personeel wat in die vier kampe werk.Cowley het gesê bewaringstoerisme in die gebied het meer as 100 mense in diens. “As ’n maatskappy, ’n toeroperateur wat ook kampe bedryf, dra ons jaarliks byna N$250 miljoen by tot Namibië se ekonomie.”– republikein@republikein.com.na

Hof stop bou van mynpad in toerismekonsessie

Kommentaar

Republikein 2024-11-25

Meld asseblief aan om kommentaar te lewer

Hof stop bou van mynpad in toerismekonsessie

Kommentaar

Republikein 2024-11-25

Meld asseblief aan om kommentaar te lewer

MELD AAN

Advertensie