NWR beoog om oorde, dienste te verbeter
Toekomsplanne om kampterrein op te knap
Namibia Wildlife Resorts deel dié staatsinstansie se planne om sy dienste en geriewe op te skerp.
Namibia Wildlife Resorts (NWR) het die afgelope maande onder skerp kritiek deurgeloop vir onder meer die instandhouding van paaie in die Etosha Nasionale Park, asook etes wat by verskeie oorde en kampeerplekke oraloor die park te koop aangebied word.
NWR se woordvoerder, Nelson Ashipala, meen die openbare kritiek bied aan die maatskappy die geleentheid om sy dienste te verbeter.
Hy sê die Covid-19-pandemie se skadu hang steeds oor die NWR.
“Gedurende die pandemie het ons aan ons werknemers ’n skeidingspakket aangebied, en talle van ons meer ervare sjefs en kokke het dit aanvaar,” het hy gesê.
Hy sê egter dat NWR bereid is om sy foute te erken en sy dienste te verbeter.
“Ons wil ons werknemers se vaardighede opskerp, dus stuur ons hulle in die nuwe jaar vir opleiding. Ons het reeds die opleidingsinstansies geïdentifiseer en sal vroeg in die nuwe jaar reeds begin met die nodige personeelopleiding,” het Ashipala gesê.
Hy het alle navrae rakende die instandhouding van paaie en die Namutoni-fort onderskeidelik na die ministerie van die omgewing, bosbou en toerisme en die Nasionale Erfenisraad verwys.
KAMPEERPLEKKE
Ashipala sê NWR is tans besig om planne te ontwikkel om sy kampeerterreine op te knap.
“Ons besef die geriewe by van ons kampterreine is in ’n vervalle toestand, maar mens moet onthou dat talle van daardie infrastruktuur in die 80’s gebou is.
“Dit is ’n lang en duur proses om dit te verwyder en te vervang. Dus kan NWR nie al die geld wat ons vir onderhoudswerk begroot het aan dié projekte bestee nie. Ons moet sorg dat ons finansies eweredig aangewend word,” het hy gesê.
Hy voeg egter by: “Ons het reeds geld vir die opknappingswerk bewillig. Benewens die opknappingsbegroting het ons N$16 miljoen geoormerk om volgende jaar ons geriewe te verbeter.”
Asphipala het bygevoeg verskeie lede van NWR se topbestuur is tans besig om om die beurt besoek aan verskeie oorde af te lê om kwessies rakende die gehalte van die NWR se diens te identifiseer.
BETER TOEKOMS
Ashipala het gesê NWR is tans ook besig om ’n nuwe produk te ontwikkel.
“Ons wil volgende jaar ’n nuwe diens van stapel stuur waar besoekers aan ons oorde eenvoudig ’n kode kan skandeer en klagtes op ons stelsel kan aanmeld.
“Ons is ernstig oor die opknapping en verbetering van ons oorde en ons dienste.”
Hy meen daar is geen rede dat NWR nie kan byhou met sy private mededingers nie.
“Ons sê nie ons is perfek nie, maar ons hoop om perfek te word. Ons moet op ons beste wees,” het hy gesê.
Volgens Ashipala sal NWR oor die komende jaar daarop fokus om ’n topgehalte ervaring aan Namibiërs teen sakpaspryse te bied.
“Ons wil hê Namibiërs moet reis en die land teen die laagste koste moontlik ervaar. Dit is hoekom ons ’n inisiatief soos die Namleisure-lidmaatskap aanbied.”
– [email protected]
NWR se woordvoerder, Nelson Ashipala, meen die openbare kritiek bied aan die maatskappy die geleentheid om sy dienste te verbeter.
Hy sê die Covid-19-pandemie se skadu hang steeds oor die NWR.
“Gedurende die pandemie het ons aan ons werknemers ’n skeidingspakket aangebied, en talle van ons meer ervare sjefs en kokke het dit aanvaar,” het hy gesê.
Hy sê egter dat NWR bereid is om sy foute te erken en sy dienste te verbeter.
“Ons wil ons werknemers se vaardighede opskerp, dus stuur ons hulle in die nuwe jaar vir opleiding. Ons het reeds die opleidingsinstansies geïdentifiseer en sal vroeg in die nuwe jaar reeds begin met die nodige personeelopleiding,” het Ashipala gesê.
Hy het alle navrae rakende die instandhouding van paaie en die Namutoni-fort onderskeidelik na die ministerie van die omgewing, bosbou en toerisme en die Nasionale Erfenisraad verwys.
KAMPEERPLEKKE
Ashipala sê NWR is tans besig om planne te ontwikkel om sy kampeerterreine op te knap.
“Ons besef die geriewe by van ons kampterreine is in ’n vervalle toestand, maar mens moet onthou dat talle van daardie infrastruktuur in die 80’s gebou is.
“Dit is ’n lang en duur proses om dit te verwyder en te vervang. Dus kan NWR nie al die geld wat ons vir onderhoudswerk begroot het aan dié projekte bestee nie. Ons moet sorg dat ons finansies eweredig aangewend word,” het hy gesê.
Hy voeg egter by: “Ons het reeds geld vir die opknappingswerk bewillig. Benewens die opknappingsbegroting het ons N$16 miljoen geoormerk om volgende jaar ons geriewe te verbeter.”
Asphipala het bygevoeg verskeie lede van NWR se topbestuur is tans besig om om die beurt besoek aan verskeie oorde af te lê om kwessies rakende die gehalte van die NWR se diens te identifiseer.
BETER TOEKOMS
Ashipala het gesê NWR is tans ook besig om ’n nuwe produk te ontwikkel.
“Ons wil volgende jaar ’n nuwe diens van stapel stuur waar besoekers aan ons oorde eenvoudig ’n kode kan skandeer en klagtes op ons stelsel kan aanmeld.
“Ons is ernstig oor die opknapping en verbetering van ons oorde en ons dienste.”
Hy meen daar is geen rede dat NWR nie kan byhou met sy private mededingers nie.
“Ons sê nie ons is perfek nie, maar ons hoop om perfek te word. Ons moet op ons beste wees,” het hy gesê.
Volgens Ashipala sal NWR oor die komende jaar daarop fokus om ’n topgehalte ervaring aan Namibiërs teen sakpaspryse te bied.
“Ons wil hê Namibiërs moet reis en die land teen die laagste koste moontlik ervaar. Dit is hoekom ons ’n inisiatief soos die Namleisure-lidmaatskap aanbied.”
– [email protected]
Kommentaar
Republikein
Geen kommentaar is op hierdie artikel gelaat nie