Toerisme herstel ondanks uitdagings

Die toerismesektor staar steeds inflasie in reis en toerisme in die gesig, naamlik hoë vervoer- en verblyfkoste, asook wisselvallige oliepryse. Groot konflikte en spanning regoor die wêreld beïnvloed steeds verbruikersvertroue, terwyl uiterste weersomstandighede en personeeltekorte ook kritieke uitdagings vir prestasie in die toerismesektor inhou.Die Verenigde Nasies se Wêreldreis-organisasie (UNWTO) het gesê ondanks die algemeen sterk resultate wat vanjaar in die toerismesektor ervaar is, bestaan daar steeds verskeie uitdagings in terme van die ekonomie, geopolitiek en die klimaat. MISDAAD TEEN TOERISTEDie woordvoerder van die Namibië Toerismeraad (NTB), Flora Quest, het gesê toerisme is 'n belangrike sektor in Namibië se ekonomie wat aansienlik bydra tot die land se bruto binnelandse produksie (BBP) en duisende werksgeleenthede verskaf. Sy meen dit is dus noodsaaklik om toeristeveiligheid te verseker en sodoende hierdie ekonomiese lewenslyn te handhaaf."Met ’n kommerwekkende toename in misdaad teen toeriste wat na Namibië reis, moet beide plaaslike owerhede en die gemeenskap die beskerming van besoekers prioritiseer. Veilige reiservarings verbeter nie net Namibië se beeld as 'n verwelkomende bestemming nie, maar bevorder ook vertroue onder potensiële toeriste."Wanneer reisigers veilig voel in hul omgewing, is hulle meer geneig om hul positiewe ervarings met vriende en familie te deel en ander aan te moedig om die skoonheid van Namibië te verken."WÊRELDWYE HERSTELVolgens die UNWTO het ongeveer 1,1 miljard toeriste in die eerste nege maande van 2024 internasionaal gereis en die sektor het wêreldwyd 98% van die pre-pandemie-vlakke herstel. Sy jongste World Tourism Barometer weerspieël dié sektor se merkwaardige herstel sedert die Covid-19-pandemie toerisme wêreldwyd tot ’n stilstand geruk het. Dit voorspel ’n volle herstel teen die einde van die jaar, ondanks verskeie uitdagings. Die verslag toon ook uitstekende resultate in terme van internasionale toerisme-inkomste vir die meeste bestemmings met beskikbare data wat groei van dubbelsyfers toon, vergeleke met dié van 2019. "Die sterk groei in besoekers is uitstekende nuus vir ekonomieë regoor die wêreld. Die feit dat besoekersbesteding selfs sterker groei, het ’n direkte impak op miljoene werksgeleenthede en klein besighede. Dit dra beslis by tot die betalingsbalans en belastinginkomste van baie ekonomieë," het die UNWTO-sekretaris, Zurab Pololikashvili, gesê.Volgens die UNWTO het internasionale toeristebesoeke sterk in die eerste nege maande van 2024 gegroei, aangedryf deur 'n sterk post-pandemiese aanvraag in Europa en goeie prestasie van groot bronmarkte wêreldwyd.Die Midde-Ooste het in hierdie tydperk van nege maande steeds rekordgroei geniet (29% vergeleke met 2019), terwyl Afrika (6%) en Europa (1%) ook 2019-vlakke oorskry het.Intussen het die Namibië Statistieke-agentskap (NSA) se "Composite Passengers Movement Index" – saamgestel uit internasionale, streeks- en binnelandse besoekers en passasiers wat vertrek by lughawens – in Oktober 2024 ’n afname op 'n maandelikse basis van 1,8% getoon in teenstelling met 'n groei van 0,4% in die vorige maand. Die indeks het egter op ’n jaargrondslag met 4,5% gegroei.Daar is volgens die indeks ’n totaal van 103 584 passasiers in Oktober 2024 aangeteken wat by lughawens regoor die land gearriveer en vertrek het, vergeleke met 105 483 passasiers wat in September 2024 aangeteken is, teenoor die 99 162 passasiers in September verlede jaar.’N JAAR OM TE VIERDie minister van die omgewing, bosbou en toerisme, Pohamba Shifeta, het in sy feesseisoen-boodskap aan Network Media Hub (NMH) gesê dat die jaar 2024 een is wat deur die toerismebedryf gevier kan word. "Ons is opgewonde, want ons het amper ten volle herstel. Ons het ’n verwoestende Covid-pandemie gehad wat die toerismebedryf in paniek gebring het. Maar ons herstelplan het gewerk."Hy het ook ’n beroep op die sektor gedoen om kliënte baie goed te behandel en uitstekende diens te lewer. Shifeta het gesê Namibië moet sy gasvryheid en goeie kliëntediens aan elke toeris wat die land besoek, ten toon stel.– republikein@republikein.com.na

Toerisme herstel ondanks uitdagings

Kommentaar

Republikein 2025-03-28

Meld asseblief aan om kommentaar te lewer

Toerisme herstel ondanks uitdagings

Kommentaar

Republikein 2025-03-28

Meld asseblief aan om kommentaar te lewer

MELD AAN

Advertensie