Eerste lugvaartforum ontmoet volgende week in Windhoek

Sowat 35 bekende sprekers – plaaslik en internasionaal – is deel van die Namibië Lugvaartforum wat volgende week in Windhoek vergader en verskeie sleutelpunte in die bedryf sal bespreek. Die doel van die forum, die eerste van sy soort in Namibië, is om ‘n platform te skep waar sleutelrolspelers enige idees kan deel, bespreek en in werking stel om die toekoms van lugvaart in die land vir die volgende paar jaar te verseker.

Dit het ook ten doel om die bedryf se rol as sleutel tot die land se ekonomiese herstel en groei verder te vestig asook die herlewing van lugvaart en verwante bedrywe en in veral toerisme ‘n hupstoot te gee.

Tydens die aanvang van die verrigtinge op 17 November sal elke werksgroep ‘n opsomming van sleutelpunte met afgevaardiges deel wat sal bydra tot die uiteindelike finale verslag wat na afloop van die forum opgestel sal word.

Sleutelpunte waarop gefokus sal word, sluit onder meer in opleiding en die ontwikkeling van vaardighede, die ontwikkeling van streeks- en internasionale roetes, belegging in infrastruktuur, sowel as die moontlikheid van ‘n toekomstige lugredery. Nog ‘n besprekingspunt sluit in lugvaart se plek in die ontdekking van olie en die voordele van groenwaterstof.