Padwerke op Peter Nanyembaweg amper voltooi

Alhoewel daar moontlik nie sigbare masjinerie en werkers op die terrein is nie, is uitgebreide padwerke aan die gang om Eneas Peter Nanyembaweg – voorheen Monte Christostraat – in ’n dubbelbaan te omskep. Volgens Stad Windhoek (CoW) wat in samewerking met die Padowerheid (RA) dié projek bestuur, sal ’n gedeelte van die pad na verwagting dié week vir padgebruikers oopgemaak word.

Die suidelike gedeelte sal egter na verwagting teen 9 Augustus eers voltooi word. Intussen kan motoriste voortgaan om die Brakwater- en Katutura-wisselaar op die B1-hoofweg en interne hoofpaaie te gebruik om by hul bestemmings uit te kom.

“Ons vra intussen dat padgebruikers geduldig is terwyl hierdie nodige werk afgehandel word. Ons verstaan ​​die ongerief en ons doen ons bes om hierdie werk so vinnig en doeltreffend as moontlik af te handel,” het die CoW se woordvoerder, Lydia Amutenya, gesê.