Waarheen met die vis?

Swakopmund se voorgestelde geriewe vir die skoonmaak van vis het gesorg vir die spreekwoordelike knuppel in die hoenderhok, met kommer wat uitgespreek is oor die impak daarvan op toerisme en die omgewing. Volgens die munisipaliteit se woordvoerder Linda Mupupa, moet die bestaande skoonmaakgeriewe oorkant die Nasionale Mariene Inligting- en Navorsingsentrum verskuif word omdat dit tans op private grond geleë is. Die geriewe is ook tussen twee hotelle geleë. Die munisipaliteit het vier potensiële persele vir die nuwe geriewe geïdentifiseer – drie in die Henrichsen- openbare park wat langs die see tussen die kaai en die nasionale akwarium geleë is, terwyl die vierde een by ’n parkeerterrein in die sakegebied naby die tronk op die kusdorp geleë is. Dié voorstelle het inwoners op die dorp egter verdeel, met sommige wat van mening is dat dit noodsaaklik is dat die skoonmaakgeriewe naby die see moet wees.’n Plaaslike inwoner Danie du Toit sê “dit is ’n baie goeie idee om dit reg langs die see te hê. Toeriste hou daarvan om te sien hoe vissermanne werk”. Hy het ook daarop gewys dat die geriewe waar dit tans geleë is, langer hier is as sommige van die nabygeleë hotelle. Du Toit voel teenkanting teen die verskuiwing is misplaas. Ander stem egter saam dat die skoonmaakgeriewe van vis nie naby gesogte toerismegebiede moet wees nie. “Die skoonmaak van vis is morsig en dit stink,” sê nog ’n inwoner Keren Till. “As ons moet kies, is opsie D in die sakegebied die enigste een.”Talle inwoners soos Chantelle Bosch glo die geriewe moet na ’n nywerheidsgebied verskuif word. Die munisipaliteit het verskeie sleutelkriteria uitgelig om die finale ligging te kies.“Die munisipaliteit betrek die publiek aktief om menings en voorstelle te kry,” het Mupupa gesê. “Die insette wat ons kry, sal oorweeg word voordat ’n finale besluit geneem sal word.”Wanneer ’n geskikte perseel gekies is, sal ’n omgewingsimpakstudie (EIA) die potensiële impak op openbare gesondheid, die omgewing en die plaaslike ekonomie bepaal. Die studie sal ook soneringswette, die beskikbaarheid van nutsdienste, sowel as die algehele koste oorweeg. Talle inwoners het kommer uitgespreek oor die moontlike impak van die skoonmaakgeriewe op Swakopmund se toerismebedryf.Die munisipaliteit beklemtoon egter dat hierdie kommer ernstig opgeneem en deur die evalueringsproses getakel sal word. “Die omgewingsbestuursplan sal maatreëls uiteensit om hierdie impak te vermy, uit te skakel of te versag,” het Mupupa verduidelik. “Wanneer die plan deur die omgewingskommissaris goedgekeur is, word dit ’n bindende dokument waaraan die raad moet voldoen.”Die munisipaliteit het inwoners verseker dat enige perseel wat gekies word, voldoende toegerus sal wees om in die behoeftes van plaaslike vissermanne te voorsien.“Oorwegings vir die verbetering van infrastruktuur sluit in voldoende parkering, toiletgeriewe, skoonmaakstasies met voldoende dreinering en afvalverwydering, voldoende sekuriteit en gereelde instandhouding,” het Mupupa gesê. Maatreëls vir gereelde skoonmaak en bestuur van afval, sal ook in plek wees om gesondheidsgevare te voorkom. Inwoners sal verdere geleenthede hê om insette tydens die EIA-proses te lewer, het sy beklemtoon. Die munisipaliteit sal voorts die jongste verwikkelinge met die publiek deel en het inwoners aangemoedig om raadsvergaderings by te woon waar die kwessie bespreek sal word. Gemeenskapslede kan nog tot vandag hul terugvoering deur die kantoor vir omgewingsgesondheid gee. – republikein@republikein.com.na

Waarheen met die vis?

Kommentaar

Republikein 2025-04-15

Meld asseblief aan om kommentaar te lewer

Waarheen met die vis?

Kommentaar

Republikein 2025-04-15

Meld asseblief aan om kommentaar te lewer

MELD AAN

Advertensie